"ABŞ və Rusiya arasında artıq gərginlik başlayıb”.
Bunu "Sherg.az”a ABŞ Maliyyə Nazirliyinin hazırladığı "Kreml hesabatı" sənədi haqqında danışarkən politoloq Fikrət Sadıqov deyib.
O vurğulayıb ki, iki böyük güc arasında qarşıdurma 2014-cü ildən güclənir:
"Bu sənəddə 200-ə yaxın rusiyalı tanınmış şəxsə qarşı sanksiya müəyyən olunub. Siyahıya oliqarxlar, prezident administrasiyasının üzvləri, rəhbərlikdə təmsil olunan şəxslər və s. daxil edilib. Düşünürəm ki, "Kreml hesabatı”ndan sonra qarşıdurma güclənəcək və Rusiya mütləq cavab addımları atacaq. Bəzi analitiklərin fikrincə bu, ABŞ və Rusiya arasında münasibətlərin qırılması deməkdir. Bu isə həqiqətən mənfi haldır.
ABŞ-ın Rusiyaya qarşı sanksiyalarının müəyyən əsasları var idi. Amma Amerika bunu bir qədər də şişirdilmiş vəziyyətdə gündəmə gətirir. Təhlükə ondan ibarətdir ki, "Kreml hesabatı” Rusiyanı qıcıqlandırır, düşünülməmiş, qeyri-adekvat addımlara əsas verir”.
Qeyd edək ki, Rusiya prezidenti Vladimir Putin də ABŞ Maliyyə Nazirliyinin "Kreml hesabatı" sənədinə münasibət bildirib. V. Putin ABŞ tərəfinin bu addımını dostcasına olmayan hərəkət adlandırıb.
Aysel Aslan
