Guya stansiyanı təmir edəcəklər
Ermənistanın Metsamor Atom Elektrik Stansiyası (AES) təmir işləri ilə əlaqədar fəaliyyətini dayandırır. Bunu stansiyanın direktoru Movses Vardanyan bildirib.
Direktor vurğulayıb ki, AES-də təmir işləri sentyabrın 20-də başlayacaq: "Təmir işləri 61 gün davam edəcək və noyabrın 20-də yekunlaşacaq. Bu tarixdən sonra yenidən istismara veriləcək”. Xatırladaq ki, Azərbaycan və Türkiyə rəsmiləri, ictimai təşkilatları Ermənistan AES-in bölgəni radioaktiv tullantılarla çirkləndirdiyini dəfələrlə bəyan edib və stansiyanın bağlanmasını beynəlxalq təşkilatlardan tələb ediblər. Düşmən ölkədə yetişən təhlükə ilə bağlı "Şərq”ə danışan siyasi elmlər doktoru, professor Cümşüd Nuriyev deyib ki, Metsamor stansiyası zəlzələ zonasında yerləşir. Bu qədər aktiv ərazidə yerləşən atom stansiyası hər an ciddi faciəyə səbəb ola bilər: "1990-cı illərdə ermənilər Metsamoru təmirə bağlamışdılar. Guya onun reaktorunu təmir etmək istəyirdilər. Amma bu, mümkün deyil. Çünki stansiyadakı bütün cihazlar keçmiş sovet texnologiyasının məhsuludur. Bu səbəbdən onların bərpası mümkünsüzdür. Hətta Yaponiya qədər inkişaf etmiş ölkə belə zəlzələdən sonra atom elektrik stansiyasını izolyasiya edə bilmədi. Bərbad durumda olan Ermənistan atom stansiyasını təmir edə bilərmi? Əlbəttə, yox. Bütün bunlar baş qatmaq, dünya ictimaiyyətini aldatmaq üçün ortaya atılmış məsələlərdir. Əslində heç bir təmirdən söhbət getmir”. Politoloqun sözlərinə görə, Ermənistan Metsamoru bərpa etmək üçün Avropa Birliyindən 300 milyon avro istəyir. Amma anlamırlar ki, faciə baş versə, heç bir məbləğ onları qorumayacaq: "Ən qorxulusu odur ki, Metsamor stansiyasına bir şey olsa, ətrafda ölənlərin hamısı müsəlmanlar olacaq. Çünki Ermənistana qonşu olanlar türklər, azərbaycanlılar və Gürcüstanda yaşayan soydaşlarımızdır. Yəni Allah eləməsin, istənilən partlayışda ölən 5 nəfərdən 4-ü müsəlman olacaq. Hələ ki, Ermənistan bomba ilə oynayır, nə vaxt partlayacağını Allah bilir”.
İsmayıl
