"Rəsmi orqanların müxalifətin mitinq tələbinə icazə verməməsi tamamilə qanuni və real şəraitə uyğundur”.
Bunu "Sherg.az”a açıqlamasında "Bakı-Xəbər” qəzetinin baş redaktoru Aydın Quliyev deyib.
Baş redaktor bildirib ki, icra hakimiyyəti qərar çıxararkən dövlətin təhlükəsizliyinə, ictimai asayişin qorunmasına və fərdlərin hüquqları arasındakı balansa söykənib:
"Məsələyə radikal müxalifət kimi birmənalı yanaşmaq yolverilməzdir. Bu qərarı sərbəst toplaşmaq azadlığının pozulması kimi qiymətləndirmək qətiyyən doğru deyil.
Hüquqlardan istifadə edən hər bir subyekt öz məsuliyyət hissini də dərk etməlidir. Bu, həm dövlət, həm ictimai təhlükəsizliyin qorunması ilə bağlı məsuliyyət hissidir.
Rəsmi orqanlar bütün məsələləri nəzərə alaraq, sözügedən qərarı veriblər. Yəni verilən qərar dövlətin ictimai maraqlarına tamamilə uyğundur. Eyni zamanda fərdlərin hüquqlarının qorunmasına, yəni aksiyada iştirak etməyən sıravi insanların da hüquqlarının müdafiəsinə xidmət edən qərardır. Digər tərəfdən məlumdur ki, əvvəlki aksiyalarda bir sıra qanun pozuntuları olub. Hələlik o pozuntuların araşdırılması başa çatmayıb”.
A.Quliyevin sözlərinə görə, daha yaxşı olardı ki, radikal müxalifət əvvəlki aksiyalarda yol verilmiş qanun pozuntularının araşdırılması üçün rəsmi orqanlarla əməkdaşlıq edərdilər. Onlara köməklik edərdilər:
"Araşdırma prosesi başa çatandan sonra yeni aksiyanın keçirilməsinə qərar vermək ən doğru-düzgün yol idi. Ancaq radikallar əvvəlki qanun pozuntularının araşdırılması başa çatmamış yeni pozuntuların baş verməsi üçün münbit şərait yaratmağa çalışdılar. Ona görə də BŞİH-nin qərarını ümumiyyətlə mitinqə qoyulan qadağa kimi dəyərləndirmək olmaz. Bunu sadəcə olaraq real şəraitin tələblərinə uyğun, mövcud qanunvericilik çərçivəsində verilmiş zəruri qərar kimi başa düşmək lazımdır”.
İsmayıl
