Əmək və əhalinin sosial müdafiəsi naziri Sahil Babayev özəl pensiya sistemlərinin yaradılması ilə bağlı qanunvericilikdə hər hansı məhdudiyyətin olmadığını deyib. Onun sözlərinə görə, istənilən şəxs özəl pensiya sistemi yarada bilər.
Nazir bildirib ki, özəl pensiya sisteminin yaranması üçün onun kommersiya və mənfəətlik tərəfi olmalıdır: "Bu, birbaşa məşğulluq bazarına, əhalinin gəlirlərinə, əməkhaqlarına, onların üzərində aparılan araşdırmalara bağlıdır. Bu gün Azərbaycanda həyat sığortası fəaliyyət göstərir. Bu, özəl pensiya sisteminin ilk pilləsidir. Onların inkişafının müəyyən mərhələsində özəl pensiya fondlarına çevrilməsi də gözləntilərdən biri ola bilər”.
Özəl pensiya fondlarının yaradılmasının olduqca vacib olduğunu deyən iqtisadçı-alim Vüqar Bayramov "Şərq”ə bildirib ki, vətəndaşların gəlir əldə etməsi baxımından özəl fondların yaradılmasına ehtiyac var:
"Düşünürəm ki, özəl pensiya fondlarının yaradılması əsas məsələlərdən biridir. Amma özəl fondlarla bağlı bir sıra problemlər ola bilər. Bu fondlarda vəsaitin ödənilməsi mexanizmi çətindir. Nəzərə alsaq ki, özəl pensiya fondlarına ödənişlər manatla olacaq. Bu baxımdan da fonda olan inamın formalaşması əsasdır. Həmçinin yeni fondun dövlət tərəfindən dəstəklənməsi də olduqca vacibdir. Çünki insanlar əmin olmalıdır ki, həmin vəsait gələcəkdə onlara qaytarılacaq. Eləcə də həmin vəsaitin valyuta riskinin sığortalanması lazımdır. Bu baxımdan özəl pensiya fondunun yaradılması, xüsusən də ödəniş imkanı olan vətəndaşlarımıza mülkiyyət baxımından seçim hüququ verəcək. Ona görə də maddi durumları nisbətən yaxşı olan vətəndaşlarımız özəl pensiya fonduna ödəniş etmək imkanı qazana bilərlər”.
Yeganə Bayramova
