Qəbul imatahanlarının keçirilməsini Dövlət İmtahan Mərkəzinə(DİM) tapşırıblar. Həmin təşkilatın da bu işləri görəcək işçiləri var. Dövlətdən də böyük maliyyə dəstəyi almırsa, imtahanın təşkili prosesinin ödənişli olması normaldır".
Bunu Sherg.az-a Tələbə qəbulu ilə bağlı ödənişli xidmətlərinin tariflərlərindən danışarkən Xəzər Universitetinin rektoru, professor Hamlet İsaxanlı deyib.
Onun sözlərinə görə, bu proses Amerikada da belədir:
"Məsələn, orada universitetlərə qəbul imtahanları iki böyük təşkilat keçirir. Onlar da ödənişlidir. Amma bizdəki rəqəmlər gözümə bir az böyük göründü. Bu rəqəmləri az olsa yaxşıdır. Burada DİM-in günahı yoxdur. Amma ödəniş qiymətlərini azaltmaq olar. Yəni magistr olmaq istəyən bir şəxsdən hər iki mərhələ daxil olmaqla 100 manat tələb etmək həddindən artıq çoxdur. Belə imtahanlar 10-15 və 20-25 manat olarsa, bu, müəyyən mənada anlaşılar. 50 və ya 50 -dən yuxarı rəqəmlər gözümə yaxşı görünmür".
Qeyd edək ki, tələbə qəbulu ilə bağlı ödənişli xidmətlərin tarifləri açıqlanıb. Məlumata görə, orta ixtisas təhsili müəssisələrinə tələbə qəbulu ilə bağlı test imtahanında 1 iştirak üçün tarif 20, ali təhsil müəssisələrinin bakalavriat (tibb təhsili üzrə əsas təhsil) səviyyəsinə tələbə qəbulu ilə bağlı test imtahanında 1 iştirak üçün tarif 40 manat müəyyən edilib. Ali təhsil müəssisələrinin və Azərbaycan Milli Elmlər Akademiyasının magistratura səviyyəsinə tələbə qəbulu ilə bağlı imtahanda (I mərhələ) 1 iştirak üçün tarif 50, ali təhsil müəssisələrinin və Azərbaycan Milli Elmlər Akademiyasının magistratura səviyyəsinə tələbə qəbulu ilə bağlı imtahanda (II mərhələ) 1 iştirak üçün tarif 60, baza ali tibb təhsili əsasında rezidenturaya qəbulla bağlı test imtahanında (I mərhələ) 1 iştirak üçün tarif 60, baza ali tibb təhsili əsasında rezidenturaya qəbulla bağlı test imtahanında (II mərhələ) 1 iştirak üçün tarif 100, ali təhsil müəssisələrinin xüsusi qabiliyyət tələb edən ixtisaslarına tələbə qəbulu ilə bağlı qabiliyyət imtahanında 1 iştirak üçün tarif 30 və rus bölməsi abituriyentləri üçün Azərbaycan dili üzrə test imtahanında 1 iştirak üçün tarif 10 manat məbləğində müəyyənləşdirilib.
Ayyət Əhməd
