Qafqaz Beynəlxalq Münasibətlər və Strateji Araşdırmalar Mərkəzi İctimai Birliyi (QAFSAM) tərəfindən Azərbaycan Respublikasının Prezidenti Yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirilən "Azərbaycanla bağlı elmi və publisistik məqalələrin hazırlanması və xarici ölkələrin KİV-lərində yerləşdirilməsi” adlı layihəyə yekun vurub.
Dekabrın 10-da layihənin yekunları ilə bağlı Beynəlxalq Mətbuat Mərkəzində tədbir keçirilib. Tədbirdə çıxış edən Qafqaz Beynəlxalq Münasibətlər və Strateji Araşdırmalar Mərkəzi İctimai Birliyinin sədri Araz Aslanlı layihənin məqsədi və həyata keçirilən fəaliyyətlər barədə məlumat verib.
A.Aslanlı bildirib ki, layihə çərçivəsində Azərbaycanlı alimlər və tədqiqatçılar Azərbaycan həqiqətləri ilə bağlı müxtəlif həcmli materiallar (məqalələr) hazırlamış, bu materialların xarici ölkələrin KİV-lərində yerləşdirilməsi və xarici ölkələrdə təqdim olunması təmin edilib.
Materiallar Azərbaycanın xarici siyasətini, Azərbaycanın enerji siyasətini, Qarabağ problemini, Azərbaycanın mədəniyyətlərarası dialoqa verdiyi töhfələri və s. mövzuları əhatə etmişdir. Layihə çərçivəsində hazırlanmış materiallar ABŞ, Fransa, Almaniya, Avstraliya, Türkiyə, Gürcüstan və Belçikada yayınlanıb.
Layihə çərçivəsində Azərbaycanlı ekspertlərin 2 xarici ölkədə təşkil edilən 4 tədbirdə iştirakı və məruzə ilə çıxışı da təmin edilib. Bu tədbirlər Makedoniyada və Türkiyədə reallaşdırılmışdır.
Araz Aslanlı layihəyə verdiyi dəstəyə görə Azərbaycan Respublikasının Prezidenti Yanında Qeyri-Hökumət Təşkilatlarına Dövlət Dəstəyi Şurasına təşəkkür edib.
Daha sonra çıxış edən Qafqaz Beynəlxalq Münasibətlər və Strateji Araşdırmalar Mərkəzi İctimai Birliyinin sədr müavini Nazim Cəfərov xarici ölkə KİV-lərində Azərbaycan ilə bağlı materialların dərc etdirilməsinin və beynəlxalq tədbirlərdə Azərbaycan həqiqətlərinin çatdırılmasının vacibliyi mövzusuna toxunub. Nazim Cəfərov da mövzuya həssas yanaşmasına və layihəyə dəstəyinə görə Azərbaycan Respublikasının Prezidenti Yanında Qeyri-Hökumət Təşkilatlarına Dövlət Dəstəyi Şurasına təşəkkür edib.
Daha sonra tədbirdə iştirak edən qonaqlar mövzunun əhəmiyyətinə toxunmuş, bu sahədə görülən işlərin artırılmasının vacibliyini qeyd etmiş və layihə ilə bağlı fikirlərini bölüşüb.
