Gürcüstanın sabiq prezidenti Mixail Saakaşviliyə Ukraynada yüksək vəzifə həvalə olunub. Keçmiş lider prezident Pyotr Poroşenkonun yanında beynəlxalq Müşavirlər Şurasının sədri təyin edilib. Yeni təyinatın Poroşenko tərəfindən elan ediləcəyi bildirilir. İddialara görə, P.Poroşenko məsələyə dair brifinq keçirib və yığıncaqda M.Saakaşvili də iştirak edib.
Eks-prezidentin təyinatını şərh edən Qabil Hüseynli "Şərq”ə açıqlamasında qeyd edib ki, bu, simvolik vəzifədir. Ekspertin qənaətincə, Saakaşvili Ukraynanın beynəlxalq səviyyədə əlaqələrinin təmin edilməsinə yardım göstərəcək: "Saakaşvili desə idi ki, Gürcüstandakı partiyasından və təşkilatın siyasi perspektivlərindən imtina edib, onda yozmaq olardı ki, keçmiş lider Ukraynadakı mövqeyi ilə razılaşıb. Amma Saakaşvili ora müvəqqəti gətirilib. Onun vəzifəyə gəlməkdə əsas hədəfi dünyada yüksək reytinqə malik olduğunu sübut etməkdir. Yeni imkanlar qazanır. Beynəlxalq əlaqələrini gücləndirir. Bu kontaktlar vasitəsilə Gürcüstandakı siyasi proseslərə təsir göstərmək şansı əldə edir. Ən başlıcası isə odur ki, bu təyinat Saakaşvilinin reytinqinə zərrə qədər zərbə vurmadı. Reytinqini bir xeyli yüksəltdi. Saakaşvili istənilən vaxt bu vəzifədən istefa verə bilər. Bu elə bir vəzifə deyil ki, onun üzərinə uzunmüddətli məsuliyyət qoyulsun. Sabiq prezident, sadəcə, Kiyevi böhranlı durumdan çıxarmağa çalışır. Bu istiqamətdə onlara yardımçı olmaq istəyir. Amma güman etmirəm ki, Saakaşvili öz vətəninin ərazi bütövlüyü uğrunda mübarizədən və yarımçıq qoyub gəldiyi işlərin davam etdirilməsi xəttindən imtina etsin. O, ölkəsini demokrtik dövlətə çevirmək istəyir”.
Ekspert bəyan edib ki, Saakaşvili ölkəsinə qayıdacaq: "Parlament seçkilərinə bir neçə ay qalır. Saakaşvili vəd verdiyi kimi ölkəsinə qayıdacaq. Onun üçün ən başlıca hədəf Gürcüstanın inkişafıdır”.
Ayyət Əhməd
