Odessa qubernatoru Mixail Saakaşvili Gürcüstana qayıtmaq və yenidən siyasətlə məşğul olmaq fikrindədir. "Rustavi” kanalına danışan Saakaşvili deyib ki, heç kəs bunu təhdid kimi qəbul etməsin: "Mən Gürcüstana qayıtmaq və fəal şəkildə siyasi proseslərə qoşulmaq fikrindəyəm”.
Odessa qubernatoru bildirib ki, rəhbərlik etdiyi "Vahid milli hərəkat” partiyası yenilənməlidir. O, adını çəkmək istəmədiyi bir neçə siyasətçi ilə danışıqlar apardığını da söyləyib. Xatırladaq ki, 2015-ci ilin dekabr ayında Ukrayna vətəndaşlığını qəbul etdiyi üçün Mixail Saakaşvilinin Gürcüstan vətəndaşlığına son verilib. Eks-prezidentin yenidən Gürcüstan hakimiyyətinə gəlmə ehtimalını dəyərləndirən tanınmış ekspert Azər Rəşidoğlu "Şərq”ə deyib ki, əleyhinə çıxış edən qüvvələr az olmasa da, Saakaşvili fenomeni Gürcüstanda çox yüksək dəyərləndirilirdi:
"Saakaşvilinin qısa zamanda Gürcüstanda bir çox sosial problemləri həll etməsi, korrupsiyanın kökünü kəsməsi, struktur islahatları aparması onun adını əbədiləşdirdi. Həqiqətən Saakaşvili güclü siyasi xadimdir. Ancaq onun təzədən Gürcüstan hakimiyyətinə qayıtması bir qədər problemli görünür. Çünki Saakaşvili Gürcüstanda böyük islahatlar aparan şəxs olmaqla yanaşı, Osetiyanı və Abxaziyanı itirən şəxs kimi də tarixə düşüb. Bu baxımdan ölkədə onun əleyhinə işlənəcək ciddi arqumentlər var. Eyni zamanda Saakaşvilinin Gürcüstanda hakimiyyətə qayıtması Rusiya ilə yenidən qarşıdurmaya gətirib çıxara bilər. Çox güman ki, hazırda Ukrayna cəbhəsində mübarizə aparan Rusiya bu modelin işə düşməsinə maneçilik törədəcək”. A.Rəşidoğlunun sözlərinə görə, istənilən halda hər şey Qərbin mövqeyindən asılıdır. Əgər Qərb növbəti dəfə Saakaşvili modelini uğurla həyata keçirərsə, eks-prezident geri qayıdacaq. Amma o halda Gürcüstanda hansı gərginliklər yaşanacaq, vətəndaş qarşıdurması olacaqmı, bunu demək çətindir. Şəxsən mən Saakaşvilinin qayıtmasına az ehtimal verirəm”.
İsmayıl
