Xəbər verdiyimiz kimi, gənc alim Yusif Alıyev orta məktəblərdə astronomiya dərsinin zəif tədris olunmasından və ya heç keçirilməməsindən narazılıq edir. O, Azərbaycanın orbitə üç peyk buraxdığını və bu prosesin xaricilər tərəfindən həyata keçirildiyindən sitat gətirərək qeyd edib ki, orta məktəblərimizdə bu sahənin dərsləri bərbad gündədir.
Gənc alimin fikirlərini şərh edən professor, ictimai-siyasi xadim Şahlar Əsgərov "Sherg.az”a bildirib ki, Y.Alıyevin bu qənaəti doğrudur:
"Astronomiya fundamental elmlər sırasına daxildir. Bu sahə insanların dünya görüşünü çox artırır. Buna görə də orta məktəblərdə və ya digər tədris mərkəzlərində astronomiya dərslərinin keçilməsi əhəmiyyətlidir.
Eyni zamanda bu sahədə Azərbaycanın layihələri olur. Həmin layihələrdə öz vətəndaşlarımızın iştirak etməsi çox yaxşı hal olar. Məhz buna görə də Yusif Alıyevin fikirlərini müdafiə edirəm. Lakin orta məktəblərdə, digər tədris ocaqlarında bu sahənin nə üçün arxa plana salındığını da bilmirəm”.
Kənan Eynuroğlu
