"Bu Konvensiyanı çox cəsarətlə Xəzər dənizinin konstitusiyası adlandırmaq olar”.
Bunu "sherg.az”a açıqlamasında millət vəkili Aydın Mirzəzadə deyib.
Deputatın sözlərinə görə, beş dövlətin Xəzərin hüquqi statusu ilə bağlı razılığa gəlməsi təkcə regionun deyil, dünyanın ən ağrılı problemini həll etdi:
"İlk növbədə vacib bir məqamı qeyd etmək lazımdır. Problem mövcud olduğu dövrdə Xəzəryanı ölkələr mehriban qonşuluq siyasətini saxladılar. Bütün sahələrdə əməkdaşlığı genişləndirdilər. Sazişin imzalanması digər problemli regionlar üçün örnək olmalıdır. Konvensiya bütün sahil dövlətlərinin maraqlarına xidmət edir.
Anlaşmaya əsasən, hər bir dövlət üçün milli su sərhədləri müəyyənləşdirildi. Dövlətlər maraqlarına uyğun şəkildə Konvensiya çərçivəsində hərəkət edə biləcəklər. Azərbaycan açıq su hövzəsində neft hasilatında böyük təcrübəyə malikdir və bu sahədə işini davam etdirəcək. Digər dövlətlərlə birlikdə əməkdaşlıq mümkündür. Qonşu ölkələr bir-biri ilə təcrübələrini bölüşə bilərlər”.A.Mirzəzadə vurğulayıb ki, sazişin imzalanması ilə Xəzər dənizi sülh zonası elan edildi:
"Hansısa bir dövlətin dənizdə hərbi baza yaratması yasaq edildi. Lakin Xəzər sahilində olan ölkələrin dünya okeanına gəmilərlə çıxışı tam təmin olundu. Bütün maneələr aradan qaldırıldı. Xəzərin dibi ilə bağlı isə dövlətlər ikitərəfli razılaşmaya gəlməlidirlər. Yəqin ki, saziş fonunda digər məsələlər də həll ediləcək”.
İsmayıl
