Beynəlxalq müqavilələr 100 illik bağlanmır. Bu cür müqavilələrdə onun hansı müddət üçün imzalandığı göstərilir. Bəziləri isə müddətsiz bağlanır, heç bir müddət göstərilmir.
Bu sözləri "Şərq”ə hüquq üzrə fəlsəfə doktoru, politoloq Fərhad Mehdiyev beynəlxalq müqavilələrin müddətini şərh edərkən bildirib. Onun sözlərinə görə, müqavilədə heç bir müddət göstərilməyibsə, bu, müddətsiz bağlanmış müqavilədir: "Əslində ikitərəfli müqavilələr sona çatmır. İkitərəfli müqavilənin müddəti başa çatandan sonra nəyin necə olacağı yenidən müəyyənləşir. Normalda tərəflər müqaviləni yeni şəraitə görə tənzimləyirlər. Amma müqavilə müddətinin bitməsi böyük əhəmiyyət kəsb etmir”.
XXI əsrdə yeni prinsiplərin qüvvəyə mindiyini söyləyən professor diqqətə çatdırıb ki, sazişlərin 25, 50, 100 il müddətinə bağlanmasının heç bir önəmi yoxdur: "Sərhəd baxımından Azərbaycan BMT-yə daxil olanda Ermənistanın rəsmi sərhədlərinə etiraz etməyibsə, demək ki, onun rəsmi sərhədlərini qəbul edib. Ona görə də, Azərbaycan Respublikası və ya başqa dövlət İrəvanın statusuna heç nə deyə bilməz. Çünki ölkəmiz onun müstəqilliyini və ərazi bütövlüyünü tanıyıb. Tanıdığı üçün bir şey demək olmaz. Baxın, "Türkmənçay” müqaviləsi qüvvəsini itirib. Bu, Azərbaycanla Ermənistanın problemləri deyil. Bütün dünya biri-birinə qarışıb. Demək istədiyim odur ki, sərhədlərin müəyyən edilməsinə dair müqavilələrin müddəti məsələsi artıq müzakirə mövzusu ola bilməz. Bunu dilə gətirmək düzgün deyil”.
Ayyət Əhməd
