"ABŞ, Ukraynada 2019-cu ildə keçiriləcək prezident seçkilərində Rusiyanın bu marafona müdaxiləsinin qarşısını almaq üçün Kiyevə kömək etməyə hazırdır".
"Sherg.az" "lefigaro.fr"ə istinadən xəbər verir ki, bu barədə ABŞ Milli Təhlükəsizlik müşaviri Con Bolton bildirib.
O qeyd edib ki, bu müdaxilə olacaqsa, ABŞ sakit qalmayacaq:
"Ukrayna prezidenti Petro Poroşenko və mən razılaşdıq ki, ABŞ-ın və Ukraynanın qəbul etdiyi tədbirləri nəzərdən keçirəcək".
Boltonun sözlərinə görə, onlar seçkilərə müdaxiləni hüquq-mühafizə orqanlarının və ya digər normal mexanizmlərin vasitəsilə önləyə bilərlər: " Biz belə bir müdaxilənin qarşısını almaq üçün Ukrayna hökuməti ilə işə hazırıq".
Qeyd edək ki, ABŞ-ın dəstəyi ilə cənab Bolton cümə günü Ukraynanın müstəqilliyinin 27-ci ildönümü münasibətilə Kiyevdə olub və misli görünməmiş hərbi paradda iştirak edib.
Məlumat üçün bildirək ki, Rusiya ABŞ-da 2016-cı ildə baş tutan prezident seçkisinə müdaxilədə ittiham olunur. Və bildirilir ki, məhz bu müdaxilə nəticəsində Donald Trump hakimiyyətə gəldi. Bu iddia hələ də ABŞ-da araşdırılır və D.Trampın özü bunu "cadı ovu" adlandırır.
Tərcümə etdi:Ayyət Əhməd
