Prezident İlham Əliyevin uğurlu sosial siyasəti nəticəsində ölkəmizdə daim güclənən sosial təminat sisteminin əhatə etdiyi əhali qruplarından biri də uşaqlardır.
Ölkə başçısının müvafiq göstərişi ilə yeni doğulan uşaqlara verilən müavinətlər artırılıb. Prezidentin 25 fevral 2019-cu il tarixli Sərəncamına əsasən 5-dən çox uşağı olan qadınların da hər uşağa görə müavinəti 33 manatdan 55 manata qədər artıb. Eyni zamanda yeni doğulan uşaqlara görə birdəfəlik müavinət 109 manatdan 200 manata çatdırılıb.
Prezidentin sərəncamı ilə bağlı fikirlərini "Şərq”lə bölüşən millət vəkili Musa Quliyev bildirib ki, ölkə başçısının daxili siyasətində Azərbaycan vətəndaşı, onun sosial rifahı dayanır:
"Cənab Prezident 2019-cu ili sosial müdafiə və sosial rifah ili kimi elan edib. Artıq bu ilin ilk iki ayı ərzində sosial sahədə çox ciddi islahatlara başlanıb və ciddi şəkildə əmək haqları, pensiyalar, sosial müavinətlər artırılıb. Həmçinin vətəndaşlarımızın problemli kreditləri həll olunub. Bu gün cənab prezident "Diqlas” ticarət mərkəzindəki yanğınla bağlı müşavirə keçirdi. Müvafiq qurumlara tapşırıq verdi ki, zərərçəkən sahibkarlara yardım verilsin və onların digər sosial müdafiəsi təmin olunsun. Bütün bunlar onu göstərir ki, ölkə başçısı daim öz vətəndaşının yanındadır.
Elə sosial müavinətlər var ki, onların bəziləri 50-100 faiz, bəziləri isə 2 dəfə artırılıb. O cümlədən yeni doğulmuş uşaqlara görə verilən müavinətlərin də məbləği təxminən 2 dəfəyə qədər artıb. Məbləğ 109 manatdan 200 manata çatdırılıb. Bundan başqa, aztəminatlı ailələrə, 18 yaşına qədər uşaqlara yeni müavinət növu təyin olunub. Uşağa baxan valideynlər üçün də müavinətlər hazırlanıb. Eyni zamanda müharibə veteranları üçün yeni növ müavinətlər təyin olunub. Bütün bunlar uşaqlara, aztəminatlı ailələrə, əlillərə və qocalara xüsusi qayğı və diqqətin göstəricisidir.
Cənab prezident son müşavirədə də vətəndaşlara müraicətində söylədi ki, bu ilin 2 ayı ərzində bizim büdcəyə daxil olan gəlirlərimiz nəzərdə tutulandan artıb.
Yəqin ki, bu artımlar gələn aylarda da davam edəcək. Azərbaycan büdcəsi gücləndikcə vətəndaşlarımızın sosial rifahı yüksələcək. Prezident bildirib ki, bizim sosial sahədə apardığımız islahatlar bütün il boyu davam edəcək və bundan sonra da əmək haqlarının, pensiyaların, müavinətlərin artmasının şahidi olacağıq. Ümumiyyətlə, bu il bütövlükdə əhalinin problemlərinin həlli, sosial müdafiəsinin gücləndirilməsi istiqamətində islahatlar ili kimi yaddaşımızda qalacaq”.
Yeganə Bayramova
