Türkiyə bir sıra ölkələrlə ticarət dövriyyəsini milli valyutalara keçirmək üçün danışıqlara başlayıb. Həmin ölkələr arasında Azərbaycan da var.
Məlumata görə, Türkiyənin İqtisadiyyat Nazirliyi Azərbaycan, Gürcüstan, Qırğızıstan və İraq kimi
ölkələrlə ticarət dövriyyəsinin dollar və avro ilə deyil, milli valyutalarla aparılmasına nail olmağa
çalışır. Xatırladaq ki, bu yaxınlarda Türkiyə Prezidenti Rəcəb Tayyib Ərdoğan da Rusiya, İran və
Çinə ticarət dövriyyəsinin milli valyutalarla aparılması üçün müraciət edib. Prezidentin sözlərinə
görə, həmkarları bu təklifi dəstəkləyiblər. Ərdoğan hesab edir ki, atılacaq bu addım dolların sürətlə
bahalaşmasının qarşısını alacaq, eyni zamanda milli valyutanın dəyər qazanmasına səbəb olacaq.
Məlumat üçün deyək ki, cari ilin 10 ayının yekunlarına əsasən, Türkiyə Azərbaycanın əsas ticarət
tərəfdaşıdır. Ölkələr arasında ticarət dövriyyəsinin həcmi 1 milyard 26 milyon dollardan artıqdır.
Azərbaycanın ümumi ticarət dövriyyəsinin 13 faizi Türkiyənin payına düşür.
Təkliflə bağlı "Şərq”ə açıqlama verən İqtisadi və Sosial İnkişaf Mərkəzinin sədri Vüqar Bayramov deyib ki, belə cəhdlər qısamüddətli dövrlərdə müsbət effekt verir: "Müəyyən dövr ərzində vətəndaşların hesabına milli valyutanın stabilləşməsi müşahidə edilə bilər. Bir vaxtlar MDB ölkələri arasında da vahid valyuta məsələsi müzakirə olunurdu. Amma nəticə əldə olunmadı. Problem ondadır ki, bir çox ölkələrin dollara ehtiyacı var. Türkiyə digər dövlətlərlə ticarət dövriyyəsini milli valyuta ilə aparsa belə, iş adamlarının, vətəndaşların bəzən dollara tələbatı yaranır. Çünki onlar müəyyən dövrlərdə xarici ölkələrə gedirlər. Hələlik dünya pulu dollardır”.
İsmayıl
