"Summativ qiymətləndirmənin optimallaşdırılması, sayının azaldılması lazımdır”.
Bunu "Sherg.az”a tanınmış təhsil eksperti Nabatəli Qulamoğlu söyləyib.
O vurğulayıb ki, tətbiq edilən 4 kiçik summativ qiymətləndirmə üçün kifayət qədər kağız məmulatı, təşkilatı addımlar lazım olur:
"Bu prosesdə müəllim öz ənənəvi peşəsindən uzaqlaşıb, dəftərxana işçisinə çevrilir. Onun işi-gücü yazıb, pozmaq, hesabat verməkdən ibarət olur. Dövlət məktəblərdə bu işlərlə məşğul olmaq üçün əlavə ştat ayırsın. Bu mümkün olmursa, belə summativ qiymətləndirməni aktivləşdirsin.
Hazırkı qaydada aparılan summativ qiymətləndirmələr böyük vəsait tələb edir. Dəftərxana işi üçün ayrılan vəsait onu ödəməyə çatmır. Müəllimlər şagirdlərdən pul yığır, elə müəllim də var ki, şagirddən pul almaq istəmir, öz maaşından bunu ödəyir. Nəticədə müəllim üçün də əlavə maliyyə itkisinə səbəb olur. Ona görə, summativ qiymətləndirmə korrupsiyaya yol açır.
Aldığım məlumata görə, Bakı Şəhər Təhsil İdarəsi bu məsələni diqqətdə saxlayır. Hələlik qərar yoxdur. Ümid edirik ki, bu ilin sentyabr ayında hansısa tədbir görüləcək”.
Qeyd edək ki, Təhsil Nazirliyi 2018-2019-cu tədris ilindən orta məktəblərdə summativ qiymətləndirmə ilə bağlı dəyişikliklərin ediləcəyi barədə məlumat verib. Nazirlikdən bildirilib ki, 1-ci siniflərdə isə summativ qiymətləndirilmə ümumiyyətlə ləğv edilə bilər.
Aysel Aslan
