Paytaxtın küçələrində son zamanlar yol süpürən qadınların avtomobillər tərəfindən vurulması halları tez-tez baş verir. Müxtəlif önləyici tədbirlərə əl atan bəzi aidiyyəti qurumlar problemin qarşısını almaq üçün bu dəfə yol nişanlarının yaradılmasına nail olub. Belə ki, dünən səhər saatlarından Heydər Əliyev prospektinin təmizlik aparılan hissələrinə yeni nişanlar qoyulub.
Yol hərəkəti nişanlarında küçə süpürən şəxsin fotosu verilib və aşağı hissədən "Diqqət!” yazılıb. Yeni nişan təkərlər üzərində yerləşdirilib və onu istənilən yerə aparmaq mümkündür.
Sözügedən yol nişanları barədə "Sherg.az”a danışan "Avtosfer.az” saytının baş redaktoru, nəqliyyat eksperti Elməddin Muradlı Azərbaycanda "Yol hərəkəti haqqında" qanunda belə bir nişanın mövcud olmadığını vurğulayıb.
Onun sözlərinə görə, Bakı şəhər İcra Hakimiyyəti bunu qanunsuz tətbiq edir: "İcra Hakimiyyəti heç bir aidiyyəti qurumla məsləhətləşmədən kor-koranə qərar qəbul edib, yeni nişan ortaya çıxarıb. Bu gülməli haldır, eyni zamanda biabırçılıqdır. Başa düşürük ki, kommunal-təsərrüfat işçilərinin ölümünə səbəb olan qəzaların qarşısını almağa çalışırlar. Lakin "Yol hərəkəti haqqında" qanunda 1.30 nömrəli yol təhlükəsizlik nişanı mövcuddur. Həmin yol nişanını tətbiq etmək daha düzgün olardı. Sözügedən məsələ bir həftə əvvəl gündəmə gəldi. Mən özüm də nişanın qanunsuz olduğunu bildirdim. Məsələyə dərhal reaksiya verən Dövlət Yol Polis İdarəsi Bakı Şəhər İcra Hakimiyyətinə müraciət edib. Qeyd edilib ki, İH rəhbərliyi məsələ ilə bağlı ölçü götürüləcəyini bildirib. Lakin görünən odur ki, özbaşınalıq davam edir, İH aidiyyəti qurumları saymadan, öz bildiyini tətbiq etməyə davam edir”. E. Muradlı diqqətə çatdırıb ki, yeni nişanların qoyulduğu yerlərdə yol nəqliyyat hadisəsi baş verərsə, məsuliyyət daşıyacaq subyekt bəlli deyil: "Aidiyyəti orqan qəza törədən sürücüyə həmin ərazidə nişan olduğunu xatırladacaq. Lakin sürücü haqlı olaraq, həmin nişanı tanımadığını, müvafiq qanunda əks olunmadığını bildirəcək. Nəticədə anlaşılmaz vəziyyət yaranacaq”.
Yeni nişanların qanuniləşdirilməsi təkliflərinə gəlincə, ekspert bu prosesin mürəkkəb olduğunu diqqətə çatdırıb: "Bundan ötrü Milli Məclis qərar qəbul etməli, "Yol hərəkəti haqqında” qanuna dəyişiklik edilməlidir. Buna ehtiyac yoxdur. Çünki müvafiq qanunda 1.30 nişanı var, eyni məqsədi ifadə edir”.
Aysel Aslan
