"Hazırda dünyada ölkələr arasında etimadsızlıq güclüdür. Bu reallıqda "dövlətlərarası münasibətlər necə olmalıdır?” sualına ən düzgün cavab məhz Azərbaycan-Türkiyə dostluq modelidir. Azərbaycan-Türkiyə münasibətləri strateji xarakter daşıyır”.
Bunu "sherg.az”a açıqlamasında millət vəkili, siyasi elmlər doktoru, professor Elman Nəsirov deyib. Deputatın sözlərinə görə, iki ölkə arasındakı əbədi dostluq bərabər hüquqa, bir-birinə hörmət, etimad və daxili işlərinə qarışmamaq prinsiplərinə söykənir:
"Əsrlərlə davam edən dostluq münasibətləri eyni tarixi-milli kökə, dilə və qədim mədəniyyətə dayanır. Hər iki dövlətin fundamental məsələlərdə ortaq mövqedən çıxış etməsi dəfələrlə baş verib. Tarix boyu iki qardaş ölkənin münasibətləri dinamik inkişaf xüsusiyyətlərinə malik olub. Hazırda Azərbaycanda 2500-ə yaxın Türkiyəyə məxsus şirkət fəaliyyət göstərir. Həmin şirkətlər kənd təsərrüfatı, xidmət sahəsi, sənaye, ticarət, tikinti və digər sahələr üzrə genişmiqyaslı iş görürlər. Azərbaycanın da Türkiyədə 1500-yə yaxın şirkəti var. Son 6 ayın yekunlarına nəzər salsaq, görərik ki, Azərbaycanın Türkiyəyə ixracatı 652 milyon dollar təşkil edib, idxalı isə 761 milyon dollara bərabər olub. İkitərəfli ticarət dövriyyəsinin səviyyəsi 1.4 milyard dollar həcmindədir”.
Professor iki dövlət arasında hərbi əməkdaşlığın yüksək səviyyədə olduğunu bildirib:
"Bilirsiz ki, Azərbaycan torpaqları işğal altındadır. Türkiyənin bu məsələdə mövqeyi dəyişməzdir. Ankara hökuməti münaqişəinin Azərbaycanın ərazi bütövlüyü çərçivəsində həllinin tərəfdarıdır. Türkiyə dövləti fərqindədir ki, Azərbaycan torpaqları işğaldan azad edilənə qədər rəsmi Bakı ilə hərbi əməkdaşlığı gücləndirmək lazımdır. Ölkəmizin silah-sursat aldığı dövlətlər arasında qardaş Türkiyənin özünəməxsus yeri var. Azərbaycan-Türkiyə hərbi qulluqçularının mütəmadi təlimlər keçirməsi də hərbi müttəfiqliyin təzahürüdür. Türkiyə NATO ölkəsidir və ordusunun say tərkibinə görə, yalnız ABŞ-dan geri qalır”.
Qeyd edək ki, avqustun 29-da Türkiyə Böyük Millət Məclisinin sədri Binəli Yıldırım Azərbaycana səfər edib. Qardaş ölkə rəsmisi Azərbaycanla Türkiyə arasındakı yaxın münasibətlərə, dost və qardaş əlaqələrə diqqət çəkərək, hər iki ölkənin ortaq taleyi paylaşdığını bildirib. Binəli Yıldırım iki dövlət arasında bundan sonra da siyasi, iqtisadi və hərbi münasibətlərin gücləndiriləcəyini bildirib.
İsmayıl
