Almaniya ilə Türkiyə arasında münasibətlər yenidən gərginləşib. Səbəbi isə odur ki, alman hökuməti ölkəsindəki türk seçicilərə yönəlik kampaniya həyata keçirmək istəyən AKP-li nazirlər Bəkir Bozdağ və Nihat Zeybekcinin səfərlərinə icazə verməyib. O cümlədən xarici işlər naziri Mövlud Çavuşoğlunun mitinqinə də maneçilik törədilib. Almaniyanın referendum kampaniyası ilə bağlı tutduğu mövqe rəsmi Ankara tərəfindən sərt etirazlarla qarşılanıb.
Almaniya səfiri Martin Erdmann məsələ ilə əlaqədar Xarici İşlər Nazirliyinə çağırılıb. XİN nümayəndəsi Kamal Bozay tərəfindən qəbul edilən Erdmanna vəziyyətlə bağlı yaranan narahatlıq çatdırılıb və etiraz notası təqdim edilib. Türkiyə rəsmiləri də Almaniyanın nazirlərin mitinqinə qadağa qoymasını qəzəblə qarşılayıb. Prezident Rəcəb Tayyib Ərdoğan bu cür addımların nasist Almaniyasının təcrübəsindən fərqlənmədiyini deyib. Mövlud Çavuşoğlu isə bəyan edib ki, Almaniya hökuməti iki ölkənin dost olub-olmadığını müəyyənləşdirməlidir. Xatırladaq ki, FETÖ üzvlərinin bir qrupuna sığınacaq verən Almaniya dövləti Ankaranın israrlı tələblərinə baxmayaraq, onları geri təhvil verməkdən də imtina edib. Məhz bu səbəbdən iki ölkə arasında diplomatik böhran yaşanırdı. Sonuncu hadisələr isə vəziyyəti daha da dramatikləşdirib.
Məsələ ilə bağlı "Şərq”ə açıqlama verən politoloq Natiq Miri bildirib ki, Qərb dünyası, xüsusən Avropa ölkələri Türkiyədə aprel referendumunun və sistem dəyişikliyinin qarşısını almaq istəyirlər:
"Türkiyəyə qarşı təzyiqlər aprel ayına, referenduma qədər davam edəcək. Avropada, xüsusən Almaniyada milyonlarla türk yaşayır və onların əksəriyyəti Türkiyədə keçirilən seçkilərdə iştirak edirlər. Avropa ölkələrinin məqsədi xaricdəki türk vətəndaşların AKP-nin lehinə səs verməsinin, yəni referendumda "hə” deməsinin qarşısını almaqdır. Yəni bir növ siyasi hakimiyyətlə insanların təmasını məhdudlaşdırmaq istəyirlər. Əslində bu, çox cılız siyasətdir. Türkiyə əhalisinin böyük əksəriyyəti sistem dəyişikliyi ilə bağlı qərarını çoxdan verib. Avropa türklərinin səsvermədə iştirakı müəyyən qədər referenduma təsir etsə də, həlledici rol oynamayacaq. Türkiyə məsələnin birbaşa üzərinə getməklə Almaniyanın, ümumilikdə Avropanın iç üzünü dünyaya göstərmək istəyir. Çünki Qərbin yanaşması demokratik prinsiplərə və insan hüquqlarına tamamilə ziddir, ikili standartdır. Avropa ölkələri istədiklərini etsələr də, niyyətləri baş tutmayacaq. Əksinə, Qərb dünyası tərəfindən atılan hər bir addım onların özlərini ifşa edəcək”.
İsmayıl
