"Qripin bütün növlərində qorunma vasitələri eynidir. Uşaqları açıq havada qripdən mühafizə etmək lazımdır”.
Bunu "Sherg.az”a Rusiyada yayılan qrip epidemiyasının Azərbaycana keçməsinin qarşısının alınması ilə danışarkən pediatr Vaqif Qarayev deyib.
O qeyd edib ki, açıq havada uşağın ağız-burnunu bağlamaq lazım deyil:
"Uşaqların olduğu otaqda havanı tez-tez dəyişmək vacibdir. Evdə hazırlanan şirələr, maye qəbulu kifayət qədər olmalıdır. Virus əllərdə toplanır. Qoruyucu maddə kimi istifadə etdiyimiz vasitələr elə ciddi qorumur. Ona görə, əlləri tez-tez yumaq vacibdir.Evdə qrip olan xəstə ilə yaxın kontakt olmaz. Uşaqlar qrip olduğu halda kollektivə, nə bağçaya, nə də məktəbə getməlidir. Xəstəlik haqqında arayış götürüb, evdə müalicə olunmalıdır. Uşaq 1-2 gün məktəbə getməsə, tapşırıqları yerinə yetirməsə, nə olacaq ki?
Qripə yoluxmuş uşaqların məktəbə, bağçaya getməsi həm onların özləri üçün ağırlaşma verir, həm də başqa uşaqların yoluxmasına şərait yaradır. İşləyən analar əsas gətirir ki, vaxtı olmur, evdə baxa bilmir və s. Bunu haradasa anlamaq olar. Amma işləməyən analar da övladını məktəbə göndərir. Valideynlər qripə yoluxan övladını qeyd etdiyimiz şəkildə qorusa, virusun yayılması azalar. Qripdən qorunma vasitələri virusa yoluxmanı azaldır, amma tamamilə aradan qaldırmır. Ona görə, qeyd etdiyim kimi sanitar-gigiyenik qaydalara mütləq əməl etmək vacibdir”.
Qeyd edək ki, Səhiyyə Nazirliyi Rusiyada yayılan qrip epidemiyasının Azərbaycana keçməsinin qarşısını almaq üçün nəzarəti gücləndirib. Xəstə insanların ölkəmizə keçməsinin qarşısını almaq üçün sərhəd-keçid məntəqələrində yoxlama tədbirləri həyata keçirilir, müvafiq təşkilatlara şübhəli xəstələrin dərhal təcrid olunması barədə məlumat verilib, tibb müəssisələrində əks-epidemik və dezinfeksiya tədbirləri üzərində nəzarət gücləndirilib.
Aysel Aslan
