Son günlər xarici ölkələrin diplomatik nümayəndələrinin və beynəlxalq təşkilatların rəhbərlərinin Cəbrayıl rayonunun işğaldan azad edilmiş Cocuq Mərcanlı kəndinə səfəri maraqla qarşılanıb. Baş tutan səfərin gözəl təşəbbüs olduğunu deyən politoloq Qabil Hüseynli eyni zamanda bu səfəri erməni vandalizmi və işğalının iç üzünü açıb göstərmək baxımından yaxşı fürsət kimi dəyərləndirib:
"Bu səfər bir tərəfdən ermənilərin daşı daş üstündə qoymadığı Azərbaycan kəndlərinin dəhşətli mənzərəsini xarici diplomatların gözü qarşısında açır. Digər tərəfdən isə Azərbaycanda geriyə qayıtmaq istəyən insanlara yaranacağı miqyaslı planları açıb göstərir.
Yəni, biz bir növ həm təbliğatçılıq ilə məşğul oluruq, həm də erməni işğalını əyani surətdə səfirlərin gözü qarşısında açıb göstəririk. Bolqarıstan səfirinin təəssüratlarını oxudum, o, gördüklərindən dəhşətə gəldiyini bildirmişdi. Çünki faşistlər o zaman işğal etdikləri Ukrayna, Belarusiya və Rusiya kəndlərini yer üzündən silməyiblər. Məsələn, Cocuq Mərcanlıda bir dənə də olsun salamat ev qalmayıb. Demək olar ki, bu kəndi yer üzündən silib atıblar. Səfirlər digər işğal edilmiş ərazilərə getsələr, daha dəhşətli vandallığın şahidi olacaqlar.
Görərlər ki, Azəbaycan xalqına hansı zülmü verib, hansı ziyanlar vurublar. Bizə vurulan ziyanın məbləği 150-200 milyard dollar arasındadır. Bu məsələdə bəziləri bizə təbəssümlə cavab verdilər. Amma gedib görürlər ki, bir kənd yer üzərindən silinibsə, o kəndin maddi və mənəvi sərvətlərinin dəyəri neçə milyon dollarla ölçülür”.
Politoloq həmçinin Azərbaycanın erməni vəhşiliyi ilə bağlı apardığı təbliğat və təşviqat siyasətinin mühüm göstəricisi kimi işğal olunmuş ərzailərimizə beynəlxalq jurnalistlərin də aparılmasının vacib olduğunu vurğulayıb.
Onun sözlərinə görə, beynəlxalq jurnalistlər ictimai rəyin formalaşmasında daha aktiv iştirak edə bilərlər.
Yeganə Bayramova
