"Xarici işlər nazirlərinin görüşündə əsas məqsəd Xəzərin statusu ilə bağlı Xəzəryanı dövlətlərin ortaq məxrəcə gəlməsidir”.
Bunu "Sherg.az”a Moskvada keçirilən Xəzəryanı ölkələrin xarici işlər nazirlərinin görüşü haqqında danışarkən Orta Doğu Araşdırmalar Mərkəzinin rəhbəri Sədrəddin Soltan deyib. O bildirib ki, digər əsas məsələ isə Xəzəryanı dövlətlərin başçılarının sammitinin planlaşdırılmasıdır:
"Ola bilsin, bu görüşə hazırlıqla bağlı hansısa plan, sənəd müzakirə olunacaq. Çünki 3-4 il əvvəl bu ölkələrin dövlət başçılarının sammiti keçirilib. Həmin sammitdə Xəzərlə bağlı bir sıra məsələlər ortaya qoyulmuşdu. Yenidən bu məsələlərə baxılıb, qərarlar daha da inkişaf etdirilə bilər. Elə ciddi sənədin qəbul edilməsi gözlənilmir.
Azərbaycan tərəfinin maraqlandıran əsas məsələlərdən biri Xəzərin hüquqi statusudur. Burada ən çox narahatlıq yaradan İrandır. İranın Xəzərin statusu ilə bağlı razılığa gələcəyi, tərəfləri qane edən məsələləri təsdiqləyəcəyi gözlənilmir”.
Qeyd edək ki, görüşdə Xəzərin hüquqi statusu ilə bağlı yekun Konvensiya və Xəzəryanı ölkələrin dövlət başçılarının görüşünə hazırlıq məsələsinin müzakirə ediləcəyi bildirilib.
Aysel Aslan
