"Müsbət haldır ki, tərəflər birbaşa, hər hansı vasitəçi olmadan görüşdülər".
"Nikol Paşinyana təzyiqlərin artacağını proqnozlaşdırmaq mümkündür. Hətta təxribatlar da ola bilər"
"Cənubi Qafqazda sülhün əldə olunmasını istəməyən qüvvələr kifayət qədərdi"
"Azərbaycan və Ermənistan dövlət başçılarının Əbu-Dabi görüşü kifayət qədər konstruktiv, pozitiv notlarla keçdi".
Bunu "Sherg.az"a açıqlamasında Milli Məclisin üzvü Nəsib Məhəməliyev deyib.
Millət vəkili bildirib ki, 5 saata qədər davam edən görüşdə sülhün əldə olunması üçün tərəfləri narahat edən bütün məsələlərə toxunulub:
"Əbu-Dabi görüşünü, sülh müqaviləsinin imzalanması istiqamətində atılmış tarixi addım kimi qiymətləndirmək olar. Digər tərəfdən, müsbət haldır ki, Azərbaycan və Ermənistan rəhbərləri, nümayəndə heyətləri birbaşa, hər hansı vasitəçi olmadan görüşdülər. İndiyə qədər keçirilən görüşlər üçüncü tərəfin iştirakı ilə baş tuturdu. O da, effektiv olmurdu. İndi isə hər iki tərəf sübut etdi ki, problemləri vasitəçi olmadan həll etmək iqtidarındadırlar. Son zamanlar, Ermənistan cəmiyyətinin radikal-millətçi kəsimi, Kilsə Paşinyana təzyiqlərini artırmaqdadır. Baş nazirin siyasətindən narazı qalan Rusiya onlara dəstək verir. Söhbət regionda oturuşmuş və bölgəyə daxil olmaq istəyən güclərin geosiyasi rəqabətindən gedir".
Parlament üzvü vurğulayıb ki, gələn ilin martında Ermənistanda parlament seçkiləri keçiriləcə:
"Ona görə də, yaxın zamanlarda Nikol Paşinyana təzyiqlərin artacağını proqnozlaşdırmaq mümkündür. Hətta təxribatlar da ola bilər. Ermənilərin tarixən terror törətmək qabiliyyətini nəzərə alsaq, 1999-cu ilin acı təcrübəsi təkrarlana bilər. Bu da, təbii olaraq, sülh prosesinin nəinki yubadılması, ümumiyyətlə gündəlikdən çıxarılması ilə nəticələnə bilər. Nəzərə almaq lazımdır ki, Cənubi Qafqazda sülhün əldə olunmasını istəməyən qüvvələr kifayət qədərdi. Son sorğulara görə, Paşinyan opponentlərini cüzi də olsa, qabaqlayır. Ümid edək, baş nazir revanşistlərin, daşnak-millətçilərinin, keşişlərin, xaricdən göndərilən təxribatçı emissarların neytrallaşdırılmasına nail olacaq. Region axır ki, layiq olduğu sülhə qovuşacaq".
