Azərbaycan vətəndaşları, eləcə də xaricdə yaşayan soydaşlarımız rəşadətli Ordumuzun Vətən müharibəsində qazandığı tarixi Qələbə münasibətilə Prezident, Müzəffər Ali Baş Komandan İlham Əliyevə minnətdarlıq məktubları ünvanlamaqda davam edirlər.
AZƏRTAC Prezidentin saytına istinadla həmin məktubların daha bir neçəsini təqdim edir.
“Cənab Prezident, Sizə Azərbaycanın Milli Qəhrəmanı fəxri adının verilməsini istəyirik”
Bakı şəhərindən Həbib Fətəliyev yazır: “Hörmətli Prezidentimiz, dünyada Sizin kimi müdrik lider, təmiz qəlbli Ali Baş Komandan görmədim. Bizim üçün Sizdən qüdrətli rəhbər, Prezident yoxdur. Buna görə də mən və ailə üzvlərim Sizə Azərbaycanın Milli Qəhrəmanı fəxri adının verilməsini və ömürlük Prezidentimiz olmağınızı istəyirik. Allah Sizi və ailənizi qorusun!”.
“Göstərdiyiniz qətiyyətə, apardığınız uzaqgörən siyasətə, düşmən üzərində
qazandığınız Qələbəyə görə Azərbaycanın Milli Qəhrəmanı adına layiqsiniz”
Sabirabad rayonunun sakini Rövşən Məmmədov: “Müzəffər Ali Baş Komandan, 44 gün davam edən və böyük Qələbəmizlə nəticələnən Vətən müharibəsini yaşadıq. Qazandığımız Qələbəyə görə Sizə, əsgər və zabitlərimizə minnətdarlığımı bildirirəm. Sizin uzaqgörən fəaliyyətiniz, qətiyyətiniz, cəsarətiniz haqqında nəinki xalqımız, hətta aparıcı ölkələrin mediaları da yüksək fikirlər ifadə edirlər. Siz göstərdiyiniz qətiyyətə, apardığınız uzaqgörən siyasətə, düşmən üzərində qazandığınız Qələbəyə görə Azərbaycanın Milli Qəhrəmanı adına layiqsiniz. Tanrı Sizi qorusun! Tanrı Azərbaycanımızı qorusun!”.
“Xalqın Sizə və rəhbərlik etdiyiniz Orduya güvəni sonsuzdur”
Ağdam sakini Musa İsmayılov: “Müzəffər Ali Baş Komandan, bir qarabağlı olaraq Sizə dərin təşəkkürümü bildirirəm. Siz təkcə torpaqlarımızı yağı düşmən tapdağından təmizləmədiniz, həm də bizim vicdanımızı, şərəfimizi təmizlədiniz. Dünyasını dəyişmiş bütün qarabağlıların ruhunu şad etdiniz. Bütün dünyaya Azərbaycanın gücünü göstərdiniz. Cənab Prezident, tarixboyu baş verən bütün müharibələrdə ordudan yayınma halları baş vermişdir. Lakin Sizin komandanlıq etdiyiniz bu Vətən müharibəsində əksinə oldu, döyüşə getmək istəyən könüllülərin çoxluğu sübut etdi ki, xalqın Sizə və rəhbərlik etdiyiniz Orduya güvəni sonsuzdur. Otuz il işğal altında qalan torpaqlarımız verilən düzgün əmrlər, mükəmməl döyüş taktikası və uzaqgörən siyasətiniz nəticəsində azad edildi. Siz təkcə Ermənistanla mübarizə aparmadınız, onların havadarlarını da susdurmağı bacardınız. Siz 44 gün diplomatiya masasında da savaşdınız. Sizinlə qürur duyuram. Seçkilərdə Sizə səs verdiyim üçün xoşbəxtəm. Cənab Prezident, qarabağlılar adından son bir istəyimiz də var ki, Sizə "generalissimus" hərbi rütbəsi verilsin. Çünki Siz ən ali fəxri adlara, rütbələrə layiq şəxsiyyətsiniz. Ömrümüzün sonunadək Sizə borcluyuq. Allah Sizi xalqımızın başının üstündən əksik etməsin”.
“Sizin xalqımız üçün etdiklərinizin qarşısında söz tapıb demək çox çətindir”
Kürdəmirdən Xəlil Məmmədov:
“Qəhrəman Prezidentim, Siz televiziya vasitəsilə xalqımızı, eləcə də biz məcburi köçkünləri torpaqlarımızın işğaldan azad olunması münasibətilə təbrik etdikdə təəssüf ki, bizim də həmin an Sizi təbrik edib, gözaydınlığı vermək imkanımız olmur. Sizin xalqımız üçün etdiklərinizin qarşısında söz tapıb demək çox çətindir. Əgər nə zamansa Sizinlə qarşılaşsam, düşmənə qarşı əks-hücum əməliyyatı əmri verdiyiniz üçün əllərinizdən öpəcəyəm. Çünki Siz bizim kimi məcburi köçkünləri el töhmətindən qurtardınız. Cənab Prezident, Siz müraciətlərinizin birində dediniz ki, "Şuşasız işimiz yarımçıq qalar". İstərdim ki, Şuşanın girişində Sizin qızıldan heykəliniz ucaldılsın və gəlib-gedənlər Sizin qəhrəman olduğunuzu görsünlər. Düşünürəm ki, bu heykəl Sizin zəhmətinizin heç olmasa qismən qarşılığı olar. Sizi bağrıma basıb öpürəm, Sizə uzun ömür, cansağlığı və daimi Prezidentimiz olmağınızı arzulayıram”.
“Biz əminik ki, Azərbaycan xalqına məxsus bir qarış, bir zərrə torpaq da bundan sonra heç vaxt yadların təcavüzünə məruz qalmayacaq”
Bakı şəhər sakini Aytac Əzimova: “Hörmətli cənab Prezident, Azərbaycan xalqına misli görünməyən tarixi və şərəfli Qələbə yaşatdığınız üçün vətəndaş cəmiyyətinin bir üzvü kimi mənim də sevincimin həddi hüdudu yoxdur. Apardığınız məqsədyönlü siyasət nəticəsində güclənən Azərbaycan Ordusu tərəfindən mənfur düşmən üzərində qazanılan şanlı Qələbəni dəstəkləyən qardaş Türkiyə ilə yanaşı, bu Zəfəri həzm edə bilməyən, gözü götürməyən bəzi qüvvələr də mövcuddur. Otuz ilə yaxın müddətdə Azərbaycanın dilbər guşəsi Qarabağın işğaldan qeyd-şərtsiz azad olunması məsələsində dünya birliyi Azərbaycanı dəstəkləsə də, bu müddətdə üzərinə düşən vəzifəni yerinə yetirmək istəməyən bəzi qüvvələrin indiki şanlı Qələbəmizə məyusluğu gözlənilən idi.
Cənab Ali Baş Komandan, Siz dünya diplomatiya tarixinə yazılan, açıq və milli maraqlara əsaslanan siyasətinizlə Qarabağın Azərbaycan torpağı olmasını və Azərbaycanın razılığı olmadan Dağlıq Qarabağla bağlı hər hansı qərarın qəbulunun mümkünsüzlüyünü faktlarla sübut etdiniz.
Ən müasir hərbi texnologiyaların tətbiq olunduğu və hibridliyinə görə fərqlənən Vətən müharibəmizdə uğur qazanan müzəffər Ordumuzun intellektual texnologiyalarla təchizatı hərbi sahədə apardığınız islahatların nəticəsidir. Məhz Sizin siyasətinizdən ruhlanan minlərlə Azərbaycan gənci könüllü olaraq orduya yazıldı. Sizin rəhbərliyinizlə müzəffər Ordumuz 44 gün ərzində 30 ilin həsrətinə son qoyaraq düşməni diz çökdürdü. Bununla da Azərbaycan öz gücünü bütün dünyaya göstərdi, tarixi ədalət bərpa olundu. Biz xoşbəxtik, çünki varlığımız ümidlə doludur. Biz əminik ki, Azərbaycan xalqına məxsus bir qarış, bir zərrə torpaq da bundan sonra heç vaxt yadların təcavüzünə məruz qalmayacaq, Vətənimizə göz dikən olarsa, amansızlıqla susdurulacaq və məhv ediləcək. Bu tarixi Qələbənin böyük əhəmiyyəti və əvəzolunmaz yeri qədirbilən xalqımız tərəfindən həmişə yüksək dəyərləndiriləcək, tarixdə əbədi qalacaq və heç vaxt unudulmayacaq.
Qazanılan şanlı Qələbə münasibətilə bir daha Sizi təbrik edir, xalqımıza bəxş etdiyiniz sevincli günlərə görə Zati-alinizə dərin təşəkkürümü bildirirəm. Allah Sizi və Azərbaycanımızı qorusun! Qələbə bizimdir! Qarabağ Azərbaycandır!”.
“Bu Qələbə Sizin güclü iradənizin sayəsində əldə edildi”
Yevlaxdan Anar Qarayev yazır: “Cənab Prezident, Müzəffər Ali Baş Komandan, mən Sizə Yevlax gəncləri adından müraciət edirəm. 44 gün davam edən böyük Vətən müharibəsi Sizin rəhbərliyiniz ilə rəşadətli Ordumuzun Qələbəsi ilə başa çatdı. Bu qələbə Sizin güclü iradənizin sayəsində əldə edildi. Sizə olunan müxtəlif basqılara baxmayaraq güclü siyasi iradə nümayiş etdirdiniz və bu iradə bizlərə ümummilli lider Heydər Əliyevi xatırlatdı. Ümummilli liderimiz Heydər Əliyev sizə çox inandığını və Azərbaycanı uğurlu gələcəyə aparacağınızı demişdi. 2003-2020-ci illər ərzində Siz Ümummilli Liderimizin dediklərinin həqiqətən də doğru olduğunu sübut etdiniz və bizim buna heç şübhəmiz yox idi. Vətən müharibəsində 2783 şəhidimiz oldu. Bütün şəhidlərimizin ruhları qarşısında baş əyirik. Əziz Prezidentimiz, həmişə biz gənclər Sizi dəstəkləyəcəyik. Siz Azərbaycan xalqını işıqlı gələcəyə aparırsınız. Biz Sizi ömürlük prezidentimiz görürük. Siz adınızı tarixə qızıl hərflərlə yazdınız. Sizə uzun ömür, cansağlığı arzu edirik. Siz ümummilli liderimiz Heydər Əliyevin yolunu davam etdirdiyiniz kimi, Sizin oğlunuz Heydər Əliyevin də sizin yolunuzu davam etdirəcəyinə şübhə etmirik. Heydər Əliyev irsinin əbədi yaşayacağına əminik. Bu irs Azərbaycan xalqını xilas etdi və əbədi yaşamağa layiqdir”.
“Məhz Sizin uzaqgörən və müdrik siyasətiniz, Ali Baş Komandan
kimi mahir sərkərdəliyiniz sayəsində xalqımız bu Zəfəri yaşadı”
Tbilisi şəhərindən Rafiq Hümbətov yazır: “Hörmətli cənab Prezident, əvvəla, Sizi, müzəffər Azərbaycan Ordusunu və xalqımızı şanlı Qələbə münasibətilə təbrik edirik. Sentyabrın 27-də başlayan və 44 gün davam edən Vətən müharibəsində Sizin müdrik rəhbərliyiniz, əsgər və zabitlərimizin misilsiz şücaətləri sayəsində ədalətin təntənəsi və Qarabağın işğaldan azad olunması bütün dünya azərbaycanlıları kimi, Gürcüstan azərbaycanlılarının da hədsiz sevincinə səbəb olub. Əlbəttə, biz Gürcüstan sakinləriyik və yaşadığımız ölkənin sadiq vətəndaşlarıyıq. Bununla belə, biz azərbaycanlıyıq, damarlarımızda azərbaycanlı–türk qanı axır, doğma vətənimiz Gürcüstan kimi, milli vətənimiz Azərbaycanın da dərdi dərdimiz, sevinci sevincimizdir. Təbii ki, müharibənin getdiyi 44 gün ərzində Gürcüstanda yaşayan soydaşlarımız da birləşərək bir can oldular, Azərbaycanımızın haqlı mübarizəsində həmrəyliklərini göstərdilər, çoxminli dəstək mitinqləri keçirdilər, yerli icmamız 60-dək qeyri-hökumət təşkilatı ilə birgə bəyanat imzalayaraq, Gürcüstan rəhbərliyinə, Gürcüstanda yerləşən diplomatik nümayəndəliklərə, beynəlxalq təşkilatların Tbilisidəki təmsilçiliklərinə təqdim etdi, ayrı-ayrı şəxslər və təşkilatlar Qərbi Avropa dövlətlərinin parlamentlərinə müxtəlif məzmunlu yüzlərlə məktub ünvanladılar. Bərdə, Tərtər və Gəncənin bombalanmasına, dinc sakinlərin həlak olmasına etirazlarını bildirdilər, aksiyalar keçirdilər. Bu 44 gün ərzində həm də televizor ekranları qarşısında sonsuz həyəcanla Sizin müjdəli xəbərinizi gözlədik, işğaldan azad edilən hər məntəqənin adını eşitdikcə ürəkləndik, qürur duyduq, təsirli anlar yaşadıq. Nəhayət, ən möhtəşəm müjdəni - qədim Şuşanın işğaldan azad olunması xəbərini noyabrın 8-də Şəhidlər xiyabanından bəyan etdiniz. İki gün sonra isə Ermənistanın kapitulyasiya etməsi, Azərbaycanımızın düşmən üzərində parlaq Qələbə çalması xəbərini də ilk olaraq Sizdən eşitdik. Otuz ilə yaxın gözlənilən bu Qələbənin şərəfinə Gürcüstanın ayrı-ayrı bölgələrində qurbanlar kəsildi, ziyafətlər, tədbirlər təşkil olundu, şəhidlərimizin əziz xatirəsinə ehsanlar verildi. Bu ildırımsürətli müharibədə əslən Gürcüstandan olan yüzlərlə əsgərimiz də döyüşüb. Son məlumatlara görə, onlardan 16 nəfər şəhid olub. Allah bütün şəhidlərimizə rəhmət eləsin, qazilərimizə şəfa versin.
Hörmətli cənab Prezident, bu parlaq Qələbəyə, qaytarılan milli qürurumuza, özünəinamımıza, 30 ilə yaxın yağı tapdağında inildəyən əzəli və əbədi Azərbaycan torpaqlarında üçrəngli müqəddəs bayrağımızı ucaltdığınıza görə Sizə və qəhrəman Azərbaycan Ordusuna ürəkdən təşəkkür edirik.
Məhz Sizin uzaqgörən və müdrik siyasətiniz Ali Baş Komandan kimi mahir sərkərdəliyiniz sayəsində xalqımız bu Zəfəri yaşadı. Dekabrın 10-da keçirilən Zəfər Paradı isə Sizin "Qarabağ Azərbaycandır və nida" kəlamınıza əbədi bir nida qoydu. Uca Tanrı Sizi, Azərbaycanımızı və bütün azərbaycansevərləri qorusun”.
“Bu gün uğurlu siyasətinizin bəhrəsini həm də azad olunmuş ərazilərimizdə sürətlə gedən bərpa işlərində görürük”
Qax sakini Aytəkin Musayeva: “Hörmətli cənab Prezident, ölkəmizin ərazi bütövlüyünün bərpası uğrunda gedən haqlı davamızda qazandığımız möhtəşəm Qələbə münasibəti ilə Sizi və qüdrətli Ordumuzu təbrik edirəm. Hərbi və siyasi sahədə əldə etdiyiniz möhtəşəm Qələbədən, hər bir azərbaycanlı kimi mən də qürur hissi duyaraq Sizə minnətdarlıq edirəm. Bu gün uğurlu siyasətinizin, çətin və şərəfli işinizin bəhrəsini həm də azad olunmuş ərazilərimizdə sürətlə gedən bərpa işlərində görürük. Allahdan şəhidlərimizə rəhmət, yaralı əsgərlərimizə şəfa, Sizə və ailənizə can sağlığı diləyirəm. Yaşasın Müzəffər Ali Baş Komandan! Yaşasın qüdrətli Ordumuz! Qarabağ Azərbaycandır!”.
“Sizin dediklərinizi heç vaxt unutmayacağam və daim Vətənimə xidmət edəcəyəm”
Quba sakini Ömər Əliyev: “Hörmətli Prezident, cənab Ali Baş Komandan, mən Sizi çox sevirəm, hər gün Sizi televiziyada izlədikcə qürur duyuram, çıxışlarınıza fəxrlə baxıram. Otuz ildir ermənilərin tapdağı altında olan torpaqlarımız Siz və Ordumuzun sayəsində azad edildi. Sizin çıxışlarınız xalqımızı sevindirdi, düşmənə yerini göstərdi. Mənim 8 yaşım var. Uşaq olsam da, Sizin dediklərinizi heç vaxt unutmayacağam və daim Vətənimə xidmət edəcəyəm. Qarabağ bizimdir! Qarabağ Azərbaycandır!”.
“Bu Qələbə şəxsən Sizin siyasi iradənizin, yürütdüyünüz daxili və xarici siyasətin uğurlu nəticəsidir”
Şamaxı sakini Mayıl Alıcanov: “Hörmətli cənab Prezident, Qarabağ torpaqlarını erməni faşistlərindən tam azad etdiyinizə və Qələbə sevincini bizə yaşatdığınıza görə bütün şamaxılılar adından Sizə dərin minnətdarlığımızı bildirir və Sizinlə fəxr edirik. Bu Qələbə şəxsən Sizin siyasi iradənizin, yürütdüyünüz daxili və xarici siyasətin uğurlu nəticəsidir. Siz erməni faşistləri tərəfindən işğal olunmuş torpaqlarımızı azad etməklə bütün dünya azərbaycanlılarına sevinc yaşatdınız, qürurumuzu, milli mənliyimizi özümüzə qaytardınız, xalqımızın məğlubedilməzliyini bir daha dünyaya göstərdiniz. Azərbaycan Respublikasının Prezidenti kimi şəxsən Sizin və Mehriban xanım Əliyevanın işğaldan azad olunmuş ərazilərimizdə şərəf və qürur mənbəyimiz, müstəqilliyimizin rəmzi olan bayrağımızı ucaltmaqla dövlətimizin ərazi bütövlüyünü və suverenliyini, xalqımızın mənəvi birliyini, yenilməzliyini və əbədiliyini bir daha sübuta yetirdiniz. Bu böyük Qələbəni və sevinci bizə yaşatdığınız üçün Sizə minnətdarıq. Uca Tanrıdan Sizə uzun ömür, möhkəm cansağlığı və yeni-yeni uğurlar diləyirik”.
“Bu Qələbə həm də Azərbaycan xalqının özünəinamını və qalibiyyət hissini bərpa etdi”
Gəncə şəhərindən Məhəmməd Zeynalov: “Hörmətli cənab Prezident, Azərbaycan Ordusunun əsgər və zabitlərinin şücaəti, Sizin müdrik rəhbərliyiniz sayəsində qazanılan bu möhtəşəm Qələbə münasibətilə Zati-alinizi və xalqımızı ürəkdən təbrik edirəm. 44 gün davam edən Vətən müharibəsində Sizin komandanlığınız altında müzəffər Ordumuz mənfur düşmən üzərində parlaq qələbə çalaraq, 28 il işğal altında qalan torpaqlarımızı azad etdi. Bu Qələbə ölkəmizin ərazi bütövlüyü ilə yanaşı, həm də Azərbaycan xalqının özünəinamını və qalibiyyət hissini bərpa etdi. Cənab Prezident, Siz müasir ordu quruculuğunun ən mükəmməl modelinin müəllifisiniz. Bu Qələbəyə görə Sizə dərin minnətdarlığımızı bildiririk”.
“Azərbaycan Ermənistan üzərində təkcə hərbi deyil, eyni zamanda, siyasi və psixoloji qələbə qazandı”
Daşkənd şəhərindən Mais İbadov: “Möhtərəm cənab Prezident, 44 günlük Vətən müharibəsi Azərbaycan xalqının gücünü bir daha dünyaya göstərdi. Qarabağın işğal altındakı əraziləri Sizin göstəriş və əmrinizlə rəşadətli Azərbaycan Ordusunun keçirdiyi əks-hücum əməliyyatı nəticəsində azad edildi. İkinci Qarabağ müharibəsində Azərbaycan Ermənistan üzərində təkcə hərbi deyil, eyni zamanda, siyasi və psixoloji qələbə qazandı. Bununla Azərbaycan ümumiyyətlə erməni mifini darmadağın etdi. Biz - Özbəkistandakı azərbaycanlılar düşmən üzərində qazanılan bu Zəfəri böyük sevinclə qarşıladıq. Azərbaycan xalqı və Ordusu Sizin ətrafınızda hər zaman bir yumruq kimi birləşib. İkinci Qarabağ müharibəsində Sizin diplomatik addımlarınız və qətiyyətiniz Azərbaycan Ordusunda böyük ruh yüksəkliyi yaratdı. Bu gün Özbəkistanda yaşayan soydaşlarımız da birlik nümayiş etdirərək dövlətimizi və Ali Baş Komandan olaraq Sizin siyasətinizi dəstəkləyirlər. Sizin qətiyyətli çıxışlarınız bizləri fərəhləndirir. Hər birimiz Vətən yolunda döyüşməyə hazırıq. Yaşasın Azərbaycan dövləti! Yaşasın Müzəffər Ali Baş Komandan!”.
“Sizinlə fəxr edir və qürur duyuruq”
Şirvan şəhərindən Xeyrulla Əzizov: “Hörmətli cənab Prezident, bu əlamətdar, tarixi günlərdə ərazi bütövlüyümüzün tamamilə bərpa olunması münasibətilə şəxsən öz adımdan və Şirvan ziyalıları adından böyük sevinc və qürur hissi ilə Sizi, Müzəffər Azərbaycan Ordusunu və Azərbaycan xalqını təbrik edirəm. Ölkəmizə hərbi və diplomatik sahələrdə qələbə qazandıran uzaqgörən siyasətiniz üçün Sizə təşəkkür edirəm. Möhtərəm Prezidentimiz, noyabrın 10-da Sizin Azərbaycanın Birinci vitse-prezidenti Mehriban xanımla birlikdə Ulu Öndərin məzarını ziyarət edərək ata vəsiyyətini şərəflə yerinə yetirən oğul kimi hesabat verməyiniz, Şəhidlər xiyabanında xalqımıza Qələbə müjdəli müraciətiniz hər bir azərbaycanlının qəlbini riqqətə gətirdi. Sizinlə fəxr edir və qürur duyuruq. Ürəyimiz Vətən uğrunda canından keçən hər bir xilaskar döyüşçü - şəhid üçün kədərlənir. Bu şərəfli oğulları böyüdən ailələrə başsağlığı veririk. Eşq olsun Azərbaycan Ordusuna və onun Müzəffər Ali Baş Komandanına! Qarabağ Azərbaycandır!”.
“Möhtəşəm hərbi parad Türkiyə və Azərbaycan qardaşlığının nümayişi, Sizin birbaşa uğurlu zəhmətinizin bəhrəsidir”
Almatı şəhərindən Qəhrəman Sadiyev: “Hörmətli cənab Prezident, Müzəffər Ali Baş Komandan, əvvəla şəxsən öz adımdan və Almatı şəhərində yaşayan Azərbaycanlılar Assosiasiyası adından Sizi və bütün Azərbaycan xalqını bu Zəfər Bayramı münasibətilə ürəkdən təbrik edirəm. Xəyallarımızı, istəklərimizi gerçəkləşdirdiyiniz üçün Sizə böyük minnətdarlığımı bildirirəm. Çox yüksək səviyyədə təşkil olunmuş möhtəşəm hərbi parad Türkiyə və Azərbaycan qardaşlığının nümayişi, Sizin birbaşa uğurlu zəhmətinizin bəhrəsidir. Xalqımıza Sizin kimi Prezidentin başçılıq etməsi çox qürurvericidir. Bu gün hamımız Qələbə sevinci yaşayırıq və bu sevinci bizlərə yaşadan hər bir əsgərimiz var olsun, onların əllərindən, gözlərindən öpürəm və bu yolda şəhid olan hər bir Azərbaycan əsgərinə Allahdan rəhmət diləyirəm, onların ruhları qarşısında baş əyirəm. Yaralı əsgərlərimizə isə Allahdan şəfa diləyirəm. Hörmətli cənab Prezident, biz Sizinlə qürur duyuruq. Sizin rəhbərliyiniz altında Azərbaycanın müzəffər Ordusu yeni tarix yazdı və Siz həmin tarixin, XXI əsrin qəhrəmanı oldunuz. Əminəm ki, bundan sonra da Sizin uzaqgörən siyasətinizlə Azərbaycan yüksək şəkildə inkişaf edəcək və həmişəki kimi bütün mübarizələrdə qalib olacaqsınız. Biz Sizinlə fəxr edirik, Allah Sizi, Ordumuzu, millətimizi qorusun!”.
“Müzəffər Ordumuzun bərpa etdiyi dövlət sərhədlərimiz Sizin sayənizdə daimi və əbədi olacaq”
Rusiyanın Saratov şəhərindən Bəhmən Qasımov: “Möhtərəm Prezidentimiz, Müzəffər Ali Baş Komandan, biz Rusiya Federasiyasında vətən eşqi ilə yaşayırıq. Vətənimizin bu ağır günlərində daim xalqımızın yanında olduq. Cənab Prezident, ulu öndərimiz Heydər Əliyevin əsas planlarından biri ölkədə qüdrətli ordu yaratmaq idi və buna görə ona böyük hörmətimiz var. O, dahi rəhbər idi və bu işlər onun xalqına olan məhəbbətindən irəli gəlirdi. Bu məqsədlə Ulu Öndərimiz tərəfindən şanlı Ordumuzun möhkəm bünövrəsi qoyuldu, Siz isə onun layiqli davamçısı olaraq bu Ordunu daha da nizamlayaraq, gücləndirdiniz. Yaratdığınız Ordu 44 gün ərzində 30 il işğal altında olmuş doğma Qarabağ torpaqlarından yağı düşməni iti qovan kimi qovdu. Ard-arda Qələbə xəbərləri ilə bizləri sevindirdiniz. Baxmayaraq ki, 30 il BMT, ATƏT-in Minsk qrupu erməni faşizminə göz yumurdu. Cənab Ali Baş Komandan, Vətənimiz naminə gördüyünüz bütün işlərə görə Sizə minnətdarıq. Sizinlə və şanlı Ordumuzla fəxr edirik. Allah Sizi, şanlı Ordumuzu qorusun!
Cənab Prezident, bizə mənəvi dəstək olan – bir millət, iki dövlət olan Türkiyə Respublikasının Prezidenti Rəcəb Tayyib Ərdoğan çıxışlarında gözəl fikirlər söylədi: “Azərbaycanın kədəri bizim kədərimizdir, sevinci bizim sevincimizdir, qələbəsi bizim qələbəmizdir. İlham Əliyev mənim qardaşımdır!”. Bizə dəstək olmaq istəyən digər dövlətlərdən Pakistan, İsrail, Gürcüstan da başqa müsəlman ölkələri də vardır. Biz onların hər birinə bu mənəvi dəstəyə görə təşəkkür edirik. Siz bütün dövlətlərlə əlaqələri Azərbaycanın mənafeyinə uyğun qura bildiniz. Qardaş Türkiyə əsgərlərinin Azərbaycana gəlməsini və gördüyünüz bütün tədbirləri alqışlayırıq. Bu gün igid oğullarımızın qanı, canı bahasına işğaldan azad olunmuş torpaqlarımızda üçrəngli Bayrağımız dalğalanır. Qoy heç vaxt bu bayraqlar enməsin. Allah şəhidlərimizə rəhmət eləsin, onların anaları qarşısında baş əyirik. Yaralı əsgərlərimizi həyata qaytaran hərbi həkimlərimizə minnətdarıq. Cənab Prezident, biz Qarabağımızı gələcəkdə daha da çiçəkləndirəcəyinizə inanırıq. İnanırıq ki, müzəffər Ordumuzun bərpa etdiyi dövlət sərhədlərimiz Sizin sayənizdə daimi və əbədi olacaqdır. Sizinlə, müzəffər Ordumuzla fəxr edirik. Əziz Prezidentimiz, Vətənimizin qəhrəman oğlu, müzəffər Ali Baş Komandanı, xalqımızın əzizləri İlham Əliyev və Mehriban xanım Əliyeva, Sizə bu tarixi günlərdə möhkəm cansağlığı arzulayıram. Əldə etdiyimiz qələbələrə görə Sizə minnətdarıq”.