Maddi imkanının aşağı olması ilə gündəmə gələn çox sayda əsər müəllifi yazıçı-filosof Əlisa Nicata artıq Prezident təqaüdü verilir.
Bunu Cebhe.info-nun sorğusuna cavab olaraq Azərbaycan Yazıçılar Birliyinin mətbuat xidmətinin rəhbəri Xəyal Rza deyib.
"Sherg.az" Əlisa Nicatın özü ilə əlaqə saxlayıb həm bu xəbər münasibətilə təbriklərimizi çatdırmaq, həm də indiki vəziyyəti ilə bağlı məlumat almaq istədik. Lakin yazıçı hələ də durumunda bir dəyişiklik olmadığını, təqaüd verilməsi ilə bağlı informasiyanın həqiqəti əks etdirmədiyini dedi:
"Hələ heç nə verməyiblər. Yazıçılar Birliyindən demişdilər ki, guya bir illik 300 manat verəcəklər. Heç o da verilməyib. Kənardan elə bilirlər məsələ həll edilib, ancaq belə deyil. Heç bir pul yoxdur. Sadəcə Allahın ümidinə yaşayıram".
Xatırladaq ki, qışda Əlisa Nicat tədbirlərin birində evinin soyuq olduğunu, mənzili isitmək üçün qaz pulunu çatdıra bilmədiyini demişdi. Bundan sonra yazıçının üzvü olduğu Azərbaycan Yazıçılar Birliyindən təqaüd almaması qabardılıb və filosofa kömək üçün yardım kampaniyasına başlanılıb.
