Slovakiya Baş naziri Robert Fitso Ermənistana səfəri çərçivəsində qondarma “erməni soyqırımı” abidəsini ziyarət edib. “Armenpress”in məlumatına görə, onu ziyarət zamanı Ermənistanın iqtisadiyyat naziri Gevorq Papoyan və xarici işlər nazirinin müavini Vaan Kostanyan müşayiət ediblər. Fitso abidənin önünə əklil qoyub, “soyqırımı qurbanları”nın xatirəsini bir dəqiqəlik sükutla yad edib və kompleksin ərazisində küknar ağacı əkib.
Slovakiya Baş naziri Robert Fitso-nun İrəvanda qondarma “erməni soyqırımı” abidəsini ziyarət etməsi, tarixin siyasət alətinə çevrilməsinin növbəti nümunəsidir. Tarixi faktlar deyil, diplomatik maraqlar əsas götürüldükdə, belə addımlar regionda həssas balansı pozur. Fitso-nun səfəri fonunda bu cür jestlər Slovakiyanın Cənubi Qafqazdakı neytrallıq imicinə zərər verə bilər. Həqiqətlərə əsaslanmayan bu cür simvolik hərəkətlər təkcə Azərbaycanın deyil, elə gerçək tarix elminin də maraqlarına ziddir.
Siyasi Tədqiqatlar Mərkəzinin sektor müdiri, politoloq İlyas Hüseynov Sherg.az-a vurğulayıb ki, Ermənistanda qondorma soyqırımı hadisəsini onların dövlət siyasətinin təbliğinə çevrilib:
“Hər ölkəyə gələn dövlət və hökumət rəhbərini bu qondorma abidənin ziyarət edilməsinə yönəldirlər. Daha sonraki proseslərdə həmin dövlətin erməni soyqırımını tanıması və dırnaqarası soyqırımın qurbanlarını yad etməsi kimi daxili və xarici auditoriyaya məlumat ötürülür. Bu isə haqlı olaraq Azərbaycan və Türkiyənin narazılığına səbəb olur. Robert Fitso Qərb siyasətini tənqid edən və Rusiya-Ukrayna müharibəsi zamanı müstəqil mövqe sərgiləyən şəxs kimi tanınıb.
Məsələn, Fitsonun sırasında Macarıstan Baş naziri Viktor Orbanı, Serbiya Prezidenti Aleksandr Vuçiçi də qeyd edə bilərik. Lakin son proseslərə nəzər saldıqda deyə bilərik ki, Fitsonu Avropa və ya Avropa İttifaqı siyasətinin parlaq nümunəsi kimi qeyd etmək olmaz. Çünki Fitso 9 mayda qələbə paradının da iştirakçısı olub. Hesab edirəm ki, bəlkə də qələbə paradında Nikol Paşinyan Fitsonu İrəvana dəvət edib. Bu hadisənin özü erməni məkirli siyasətinin bir göstəricidir. Fitso da Ermənistan tərəfindən həmin siyasi tələyə salınmışdır. Amma bu məsələnin daha geniş araşdırılması və ona uyğun müxtəlif adımların atılması önəmlidir. Çünki Ermənistan öz xislətindən geri çəkilmir. Dırnaqarası erməni soyqırımını öz siyasi və geosiyasi alətinə çevirməyə səy göstərir”.
