Ukrayna Prezidenti Volodimir Zelenski Rusiya və ABŞ nümayəndə heyətləri arasında Ər-Riyadda aparılan danışıqları şərh edib. Bu bardəə o, videomüraciətində bildirib. Zelenski vurğulayıb ki, dünən Amerika komandası ilə görüş oldu. Bu gün ABŞ nümayəndələri və Rusiya nümayəndələri ilə danışıqlar aparıldı. Bundan sonra Ukrayna və Amerika komandaları arasında daha bir görüş oldu.
Qeyd edək ki, martın 24-ü axşam saatlarında Ər-Riyadda Rusiya və ABŞ nümayəndələri arasında on iki saatlıq məsləhətləşmələr başa çatıb.
“Müstəqil Mətbuat Mərkəzi" İctimai Birliyinin sədri, politoloq Elçin Xalidbəyli “Sherg.az”a söyləyib ki, müşahidələr ABŞ və Rusiya arasında aparılan son danışıqların Kremlin istədiyi kimi cərəyan etmədiyini göstərir:
“Xüsusilə də, ABŞ ərazi mübadiləsi mövzusunu gündəmə gətirir. Yəni Ukrayna ordusunun nəzarətində olan Rusiya ərazilərinin Moskvanın işğal etdiyi Kiyev torpaqları ilə dəyişdirilməsini istəyirlər. Bu isə rəsmi Kremlin maraqlarına qətiyyən cavab vermir. Çünki Kremldə hesab edirlər ki, Ukrayna ordusu qeyri-şərtsiz Rusiya ərazilərindən çıxmalıdır. Ukraynanın işğal altında olan əraziləri isə birmənalı şəkildə Rusiyanın nəzarətində qalmalıdır. Rusiya imperialist təfəkkürünə uyğun olaraq Ukraynadan hər şey istəyir, qarşılığında isə heç nə vermək niyyətində deyil. Digər önəmli məqam isə Amerika tərəfinin sülh sazişisinin imzalanmasından sonra sülhməramlı qüvvələrinin Ukrayna ərazisinə göndərilməsi tələbədir. Rusiya Ukraynada heç bir kənar hərbi kontingentin yerləşdirilməsini istəmir. Eyni zamanda Kremldə tələb edirlər ki, Ukrayna ordusunun və hərbi texnikasının sayı məhdud olmalıdır. Təbii ki, bu da çox absurd yanaşmadır. Rusiyada düşünürlər ki, Ukraynada sülhməramlı qüvvələr yerləşdirilsə, Ukrayna təhlükəsizlik təminatı alacaq və Kreml üçün əlçatmaz olacaq. Bütün bunları nəzərə aldıqda indiki situasiyada danışıqlar prosesinin Kremlin ümid etdiyi kimi baş verəcəyini iddia etmək çox çətindir. Amerika Tramp və Putin sövdələşməsindən geri çəkilməyə başlayıb və yeni tələblər irəli sürməyə çalışır. Danışıqlar masasında proses Rusiyanın əleyhinə olduğu üçün bunu savaş meydanında balanslaşdırmağa cəhd göstərir”.
