ABŞ sentyabr ayına qədər İranda hərbi əməliyyatları bitirməyi planlaşdırır.
Bu barədə ABŞ administrasiyasındakı mənbələrə istinadən “Daily Express” qəzeti məlumat yayıb.
“İran nüvə sazişinə razılıq verməsə və proqramını ləğv etməyə başlamasa, "sentyabr ayına qədər yox olacaq", - nəşr qeyd edib.
Politoloq Samir Hümbətov "Sherg.az"a bildirib ki, yayılan məlumatın gerçəkliyi üçün ABŞ-nin əlində potensial imkanları olmalıdır:
"Hər hansı ölkədə hərbi əməliyyat keçirmək elə də asan məsələ deyil. Məsələn, üç ildən çoxdur ki, Ukrayna bataqlığa girib və çıxa bilmir. Əslinə ABŞ böyük dövlətdir və kifayət qədər gücü də var. Onun İranı vurması böyük fəlakət deməkdir. Digər tərəfdən Vaşinqton və Tehran aralarındakı mövcud gərginliyi aradan qaldıraraq razılığa gələ bilərlər. Bu o demək deyil ki yaxın dost münasibətləri qurulacaq. Eyni zamanda ABŞ özü də İranla müharibəyə başlamaqda maraqlı deyil. Çünki baş verə biləcək istənilən münaqişə ABŞ-ın bu regiondakı müttəfiqlərini təhdid altında qoya bilər. Doğrudur, İsrail Vaşinqtona inad edir ki, İranı vursun. Lakin Ağ Ev Çin, Rusiya və digər amilləri də nəzərə alaraq addım atacaq".
