Yaponiya H3 raketi vasitəsilə Beynəlxalq Kosmik Stansiyaya (ISS) avadanlıq və materiallar çatdıracaq yeni pilotsuz kosmik yük aparatını uğurla orbitə çıxarıb.
Sherg.az xəbər verir ki, “Kyodo” agentliyinin məlumatına görə, “HTV-X” adlı bu yeni nəsil aparat Tanegaşima Kosmik Mərkəzindən buraxılıb.
Yeni enerji sistemi ilə təchiz edilmiş “HTV-X” daşınma zamanı aşağı temperatur tələb edən elmi nümunələri daşımaq qabiliyyətinə də malikdir.
Cihazın 30 oktyabrda ISS-ə çatacağı, 6 ay boyunca stansiyaya qoşulu qalacağı, daha sonra isə 3 ay ərzində sınaq uçuşları aparmaq üçün orbitdə hərəkət edəcəyi gözlənilir.
Yaponiya Kosmik Tədqiqat Agentliyinin (JAXA) məlumatına görə, “HTV-X” aparatı öz sələfi “Kounotori” ilə müqayisədə 1,5 dəfə çox, yəni təxminən 6 ton yük daşıma gücünə malikdir.
