Fələstin Dövləti İsrail Knessetinin (Parlamentin) Fələstin torpaqlarını ilhaq etməyə yönəlmiş addımlarını və “İsrail suverenliyinin tətbiqi” adı altında qəbul etdiyi son qərarı pisləyir.
Teleqraf xəbər verir ki, bu barədə Fələstinin Azərbaycandakı səfirliyi məlumat yayıb.
Bildirilib ki, Fələstin torpaqları Qüds də daxil olmaqla, İordan çayının qərb sahili və Qəzza zolağı bölünməz coğrafi bütövlük təşkil edir və İsrailin həmin ərazilər üzərində heç bir suveren hüququ yoxdur.
“Bu torpaqlara suverenlik hüququ yalnız Fələstin xalqına və onun legitim rəhbərliyinə, Fələstin Azadlıq Təşkilatına məxsusdur”, – deyə məlumatda vurğulanır.
Səfirlik həmçinin qeyd edir ki, Fələstinin mövqeyi xalqın öz doğma torpaqlarında malik olduğu təbii, tarixi və hüquqi hüquqlara, beynəlxalq hüququn prinsiplərinə, insan haqlarına və BMT-nin müvafiq qətnamələrinə əsaslanır.
