Avropa İttifaqı Rusiyaya qarşı tətbiq edilən sanksiyaların dairəsini genişləndirir. İyunun 15-də Aİ-yə üzv ölkələrin səfirləri 17-ci sanksiyalar paketi ilə bağlı yekun razılığa gəliblər.
Bu barədə Fransanın AFP agentliyi məlumat yayıb. Yeni sanksiyalar paketi Rusiyanın Ukraynadakı hərbi fəaliyyətinə dəstək verən sektor və fiziki şəxslərə qarşı əlavə məhdudiyyətləri nəzərdə tutur.
Politoloq Aytən Qurbanova Sherg.az-a söyləyib ki, Avropa İttifaqının Rusiyaya qarşı yeni sanksiyalar paketini qəbul etməsi Rusiya-Ukrayna müharibəsi ilə bağlı danışıqlar prosesinin indiki məqamda uğursuz olduğunun bariz nümunəsidir:
“Kollektiv Qərbin Rusiyaya qarşı təzyiq strategiyası davam edir. Ümumiyyətlə sanksiyalar əlavə təzyiq vasitəsi olsa da, Rusiya üzərində ciddi çəkindirici təsirinin olmadığı artıq hərkəsə məlumdur. Çünki bu istiqamətdə konkret və qətiyyətli mövqe nümayiş etdirilmir. Hətta ənənəvi qaydada Rusiyanın da Avropa mərkəzli şirkətlərə və məhsullara qarşı məhdudiyyətlər tətbiq etməsi ilə bağlı ehtimallar istisna edilmir. Eləcə də, rəsmi Kremlin bir çox istiqamətdə təsir vasitələrindən istifadə etməsi gözləniləndir. Xüsusilə də, enerji təminatı və informasiya təhlükəsizliyi baxımından Rusiya qismən də olsa müəyyən təsir mexanizmlərinə sahibdir. Deməli qarşılıqlı təzyiqlər hələ bir müddət davam edəcək. Belə bir məqamda isə atəşkəs ilə bağlı razılıq əldə olunsa belə tərəflərin onun şərtlərinə əməl etməsini gözləmək çox çətindir”.
