Növbəti mərhələdə daxildə narazılıq və federasiya tərkibində respublikaların mərkəzdən qaçma siyasəti mümkündür
Rusiya Prezidenti Vladimir Putin Təhlükəsizlik Şurasının iclasında təhlükəsizlik qüvvələrinə və mülki xidmət orqanlarına nüvə silahı sınaqlarına hazırlaşmaq barədə göstəriş verib. Bu qərar beynəlxalq səviyyədə ciddi narahatlığa səbəb olub və yeni siyasi böhranın başlanğıcı kimi qiymətləndirilir.
Milli Cəbhə Partiyasının sədr müavini, siyasi ekspert Məhəmməd Əsədullazadə Sherg.az-a açıqlamasında bildirib ki, Rusiya bu nüvə sınaqlarını ilk növbədə ABŞ-yə qarşı güc nümayişi kimi həyata keçirməyə hazırlaşır. Kreml bununla Qərbə “Rusiya yenidən qlobal güc mərkəzidir və onunla hesablaşmaq lazımdır” mesajını vermək niyyətindədir:
“Mövcud beynəlxalq nizamın deqradasiyaya uğraması və Rusiyanın artan hərbi ritorikası Vaşinqtonu da hərəkətə gətirib. ABŞ administrasiyası da cavab addımı olaraq nüvə sınaqları keçirməyə hazırlaşır. Beləliklə, iki nüvə gücünün qarşılıqlı “güc nümayişi” qlobal təhlükəsizlik sistemini daha da gərginləşdirir. ABŞ Rusiyanın yenidən fövqəldövlət statusu qazanmasına imkan verməyəcək və bu istiqamətdə preventiv addımlar atmaqda davam edəcək. Lakin V.Putinin Qərblə qarşıdurmadan geri çəkilməməsi ehtimalı həm beynəlxalq sabitliyə, həm də Rusiyanın daxili siyasi-iqtisadi vəziyyətinə mənfi təsir göstərəcək”.
M.Əsədullazadənin sözlərinə görə, Rusiya prezidentinin əsas strateji planı Şərqi Avropanı, Cənubi Qafqazı və Mərkəzi Asiyanı yenidən Rusiyanın orbitinə qaytarmaqdır:
“Amma beynəlxalq siyasi konyuktura və dəyişən geosiyasi nizam Rusiyanın bu planı reallaşdırmasının üstündən xətt çəkir. Rusiyanın qalib gəlmək şansı yoxdur. Növbəti mərhələdə Rusiyanın daxilində narazılıq və federasiya tərkibində respublikaların mərkəzdən qaçma siyasəti mümkündür”.
Şəymən
