Rövşən Abbasov: Leysan və daşqınların ardınca daha quraq havanın şahidi olacağıq
Avtomat hidroloji stansiyaların aprelin 17-si saat 10:00-a olan məlumatına əsasən, çayların həcmində artım davam edir.
Bu barədə Milli Hidrometeorologiya Xidməti məlumat yayıb.
Bildirilib ki, Böyük Qafqaz ərazisindən axan Qarasuçayda 156 sm, Əyriçayda 14 sm, Kiçik Qafqaz ərazisindən axan Zəyəmçayda 15 sm, Əsrikçayda 7 sm, Kürəkçayda 5 sm, Qarabağ və Şərqi Zəngəzur bölgəsindən axan Oxçuçayda 14 sm, Zabuxçay və Quruçayda 12 sm, Köndələnçayda 5 sm, Tutqunçay və Həkəriçayda 4 sm, Lənkəran-Astara bölgəsindən axan Təngərüdçayda 10 sm artım qeydə alınıb.
Məsələ ilə bağlı danışan ekoloq Rövşən Abbasov "Sherg.az"a bildirib ki, sudan həmişə düzgün istifadə etdikdə o bir resursa çevrilir:
“Düzgün idarə etməyəndə isə fəlakət baş verir. Əlbəttə ki, su idarəçiliyinin əsas məqsədi su ehtiyatlarının zaman və məkan daxilində effektiv paylanmasını təmin etməkdən ibarətdir. Amma bu cür ekstremal hadisələr baş verəndə bunu təmin etmək çox çətindir. Yəni bu gözlənilməz hadisədir. Qısa müddətdə illik normanın üç qatı yağıb. Ona görə də belə daşqınları idarə etmək bəzən çox çətin olur. Daşqın ehtimalları azaltmaq üçün yamaclarda meşələrin artırılması davam etməlidir. Bakı şəhərində örtüklər bərkdir, ona görə də bunu etmək bir az çətindir. Yəni asfalt örtükləri üzərində bu tip sellər daha çox əmələ gəlir"
Ekoloq qeyd edib ki, yağışların təkrarlanma ehtimalı çox azdır:
"Normadan üç dəfə artıq yağıntının qısa müddət ərzində düşməsi ekstremal bir hadisə yaradır. Bunu yenidən təkrarlanmasını heç kim deyə bilməz. Yaxın 10 günün proqnozlarında baxmaq lazımdır. Çünki leysanın yağacağı proqnoz edilmişdi. Amma artıq bu baş verib və ehtimal azalıb. Yəni atmosferdə olan rütubət, artıq yerə düşüb. Biz leysan və daşqınların ardınca daha quraq havanın şahidi olacağıq. Bu bir qanundur. Hər 100 ildə bir, ya iki dəfə baş verir”.
