Türk Dövlətləri Təşkilatının (TDT) dövlət başçılarının qeyri-rəsmi Zirvə toplantısının tarixi məlum olub.
Bu barədə TDT-nin saytında məlumat verilib.
TDT dövlət başçılarının qeyri-rəsmi Zirvə toplantısı 20-22 may tarixlərində Macarıstanın paytaxtı Budapeşt şəhərində keçiriləcək.
Qeyd edək ki, TDT dövlət başçılarının 12-ci Zirvə toplantısı isə bu il Azərbaycanda keçiriləcək.
Siyasi şərhçi Azər Həsrət “Sherg.az”a deyib ki, Prezident İlham Əliyev Türk Dövlətləri Təşkilatı (TDT) Zirvə toplantılarının tez-tez keçirilməsinin tərəfdarıdır:
“O, birmənalı şəkildə söyləyir ki, türk dövlətlərinin rəhbərləri daha çox bir araya gələrək vacib məsələləri müzakirə edərək qərarlar versələr, daha yaxşı olar. Həqiqətən də Türk Dövlətləri Təşkilatının rəsmi və qeyri-rəsmi Zirvə toplantıları ən az ildə iki dəfə keçirilməlidir. Çünki türk dövlətləri arasında müzakirə edilərək həll olunması lazım olan məsələlər həddindən artıq çoxdur. Həmin mövzularla bağlı ildə bir dəfə görüşməklə qərar vermək mümkünsüzdür. Ona görə də Türk Dövlətləri Təşkilatının Zirvə toplantılarının sayını çoxaltmaq lazımdır. Eyni zamanda Türk Dövlətlərinın Vətəndaş Cəmiyyəti təmsilçilərinin də toplantılarını da intensiv şəkildə keçirməyə zərurət var. Hazırda türk dövlətləri ilə bağlı cəmiyyət içində gedən müzakirələr baxımından da belə görüşlərin artırılması vacibdir. Elə məsələlər var ki, onlar haqqında yetərincə məlumatımız olmadığına görə cəmiyyətdə uyğunsuz ifadələr səslənir. Bu isə türk dövlətlərinin yaxınlaşmasını əngəlləyəcək amillərə çevrilə bilər. Macarıstanda və daha sonra Azərbaycanda keçirilməsi nəzərdə tutulan Zirvə görüşləri türk dünyası üçün çox əhəmiyyətlidir”.
