Türkiyənin “Haber Global” telekanalı Bakı Media Mərkəzinin prezidenti Arzu Əliyevanın Türk dünyası mədəniyyətinə töhfə mükafatına layiq görülməsi barədə süjet hazırlayıb.
“Report” xəbər verir ki, süjetdə İstanbulda keçirilən “Korkut Ata” Film Festivalının Türk dünyası mədəniyyətinə töhfə mükafatının Bakı Media Mərkəzi adına Arzu Əliyevaya Türkiyənin mədəniyyət və turizm naziri Mehmet Nuri Ersoy tərəfindən verildiyi qeyd olunub.
Bundan başqa, festivalda ən yaxşı film mükafatı da Azərbaycana verilib. Belə ki, mükafata layiq görülən film “Səpələnmiş ölümlər arasında”dır.
Festivalın sonunda isə Bakı Media Mərkəzinin ekranlaşdırdığı “Biz” filmi nümayiş olunub. Qarabağ Zəfərinə həsr olunan filmdə Vətən müharibəsində həlak olan şəhidlərin yaxınları, qazilər və xalqın yaşadığı çətin, bir o qədər də qürurlu anlardan bəhs edilib. Filmin rejissoru isə Orman Əliyevdir.
Qeyd edək ki, “Korkut Ata” Film Festivalının 2023-cü ildə Şuşada keçirilməsi nəzərdə tutulub.