Onlara lazımi şərait yaratmalıyıq ki, ölkəmizə qayıtsınlar
Azərbaycandan təkcə Almaniyaya 1400 həkimin getməsi çox düşündürücüdür. Bu sayın zamanla artacağı da dəqiqdir". Bu sözləri sosial media hesabında invaziv kardioloq, tibb elmləri namizədi Üzeyir Rəhimov bildirib. Onun sözlərinə görə, bu axının bir sıra səbəbləri var: "Həmin həkimlərin təhsil aldıqları universitetdə və ya daha sonra çalışmağa (staj görməyə) başladıqları yerlərdə aldıqları psixoloji travmalar, güvənli şəkildə həkim haqlarını qoruyan, həkim və pasient əlaqələrini tənzimləyən qaydaların olmaması və bu barədə ümumiyyətlə düşünülməməsi, maddi rifah və mənəvi əminliyin olmaması həkimlərin işləmək üçün xaricə getməsinin səbəbləri sayıla bilər".
Xaricə üz tutanların məcburiyyət üzündən bu addımı atdığını vurğulayan kardioloqun fikrincə, heç kəs vətənini buraxıb getmək istəməz: “Gedənlər bir şey itirdilərmi? Xeyr, tam əksinə, gələcəklərini güvənə aldılar. Onlar ölkəmizdən fərqli olaraq, orada həkim kimi öz işindən zövq alacaqlar. Üzücü də olsa, ora gedən məsləkdaşlarım adına sevinirəm. Heç olmasa, 1400 həmyerlim həkim kimi rahat olacaq. Lazım olduqda buradakı gənc məsləkdaşlarımıza da indiyə qədər etdikləri kimi yardım edəcəklər. 12 il xarici ölkədə tibb təhsili alıb Vətənə qayıdan biri olaraq çox şey yaza bilərəm. Papağımızı qabağımıza qoyub düşünməliyik".
Qeyd edək ki, Alman Tibb Assosiasiyasının 2022-ci ilin dekabrına olan statistikasına görə, Almaniyada 421.000 həkim çalışır. Onlardan 60 minə yaxını (14 faizdən çoxu) xarici ölkələrdən gələn həkimlərdir.
Almaniyaya gedən azərbaycanlı həkimlərin sayı isə 1359 nəfərə çatıb.
Professor Adil Qeybullanın “Sherg.az”a açıqlamasına görə, səhiyyə sahəsində müəyyən islahatlar aparılsa da, hələ də xeyli sayda problem var. Professorun fikrincə, xarici ölkədə işləmək və yaşamaq məqsədilə gedənlər üçün Azərbaycanda lazımi şərait yaratmalıyıq ki, onlar ölkəmizə qayıtsın: “Azərbaycanda tibb təhsilini bitirənlər məcburdur ki, rezidentrura təhsili üçün başqa ölkələrə getsinlər. Bu ölkələr də əsasən Türkiyə və Almaniyadır. Həkimlərimizin bu ölkələrə daha çox üz tutmasının bəlli səbəbləri də var. Almaniyada müəyyən qədər həkim çatışmazlığı var, Tükiyə ilə dilimiz eyni, oxşarlıqlarımız çox olduğundan həkimlərimiz daha çox bu ölkələrə axın edir. Lakin Fransa, İngiltərə kimi ölkələrə də axın var".
