Bu gün (12 aprel) İranın xarici işlər nazirinin başçılıq etdiyi nümayəndə heyəti İran və ABŞ müzakirələrinin keçiriləcəyi Omanın Masqata şəhərinə səfər edib.
Trend-in məlumatına görə, bunu İranın Xarici İşlər Nazirliyinin mətbuat katibi İsmayıl Bəqai “X” sosial şəbəkəsindəki hesabında yazıb.
Onun sözlərinə görə, xarici işlər naziri Seyid Abbas Araqçini səfər çərçivəsində təcrübəli əməkdaşlar müşayiət edir.
Bəqai bildirib ki, İran öz milli maraqlarını və nüfuzunu qorumaq üçün bütün potensiallardan istifadə etməkdə qərarlıdır.
Qeyd edək ki, Atom Enerjisi üzrə Beynəlxalq Agentliyin baş direktoru Rafael Qrossi 3 martda agentliyin Direktorlar Şurasının iclasında bildirib ki, İran 60%-ə qədər zənginləşdirilmiş uranın həcmini ötən rüblə müqayisədə 182 kiloqramdan 275 kiloqramadək artırıb. İran uranı bu səviyyəyə qədər zənginləşdirən yeganə qeyri-nüvə silahı dövlətidir. Bu isə ciddi narahatlıq doğurur.
Qeyd edək ki, 30 martda ABŞ prezidenti Donald Tramp bildirib ki, Tehran nüvə proqramı ilə bağlı sazişə razılıq verməsə, İran görünməmiş bombardmanlarla üzləşəcək.
Əlavə edək ki, 2020-ci ilin sonlarında İran parlamenti İrana qarşı sanksiyaların tətbiq olunmasını əsas gətirərək, sanksiyaların ləğv edilməsi məqsədilə nüvə sahəsində strateji planın icra edilməsinə qərar verib. İran parlamentinin qərarına əsasən, İran 23 fevraldan nüvə sazişində nəzərdə tutulan əlavə addımlar və əlavə protokolun icrasını dayandırıb. Bununla AEBA-nın nəzarət mexanizmi 20-30% azalıb.
İran rəsmi səviyyədə bildirir ki, İranın strategiyası atom bombasını əldə etməməkdir və İran kütləvi qırğın silahlarının istehsalını əsla dəstəkləmir.
Qeyd edək ki, ABŞ Prezidenti Donald Tramp İran və ABŞ arasında müzakirələrin birbaşa şəkildə aparılacağını bildirib. İranın xarici işlər naziri Seyid Abbas Araqçi isə sözügedən müzakirələrin dolayısı yolla 12 apreldə Omanda keçiriləcəyini qeyd edib.
