“28 aprel işğalından sonra "Azərbaycan"ı əvəz edən bir səhifəlik qəzet, "Azərbaycan Müvəqqəti Hərbi İnqilab Komitəsinin Əxbarı"nın ilk sayı 28 nisan (aprel) 1920 -ci ildə çıxıb”.
Sherg.az xəbər verir ki, bu barədə Əməkdar jurnalisti, tarix üzrə fəlsəfə doktoru, "Şərq" qəzetinin təsisçisi və baş redaktoru Akif Aşırlı öz sosial media hesabında yazıb.
Doktor qeyd edib ki, qəzetin qiyməti 5 qəpik olub:
“"Hamıya, hamıya, hamıya " müraciətində Müstəqil Azərbaycan Şura Cümhuriyyətinin Hərbi İnqilab Komitəsinin Müsavat hökümətini yıxdığını elan edir, hakimiyyəti ələ keçirdiklərini bildirir, müvəqqəti hökümət üzvlərinin adlarını sadalayırdı. Baş məqalə olaraq Ağababa Yusifzadənin "Bir qətrə qanımız” “Türkiyə Kommunist Firqəsinin təbriki”, “Cümhuriyyət parlamentinin son iclası”, "Qırmızı Azərbaycan aləmi-islam" yazılar verilib. Vərəqin məsul redaktoru məhşur bolşevik yazar Ağababa Yusifzadə idi.
Vərəqədəki kiçik xəbərlərdə Bakıda həbslərin başlandığı barədə məlumatlar qeyd olunub. Cümhuriyyət generalı Telexasın, sabiq şəhər polisi rəisi Xudiyevin, xəfiyyə polisi rəisi (Milli təhlükəsizlik naziri) Şeyxzamanovun, nazirlərdən Məlikaslanovun, baş nazir Nəsib bəy Yusifbəylinin həbs olunması xəbər verilirdi. Bu məlumatlarda qeyd olunurdu ki, sabiq hökümət üzvləri Bakını ailələri ilə tərk edən zaman üzərlərində guya, küllü miqdarda pul olub”.
