Türkiyə Prezidenti Rəcəb Tayyib Ərdoğan “Canım İstanbul” sərgisinin açılışında çıxış edərək, “Terrorsuz Türkiyə” prosesi ilə bağlı mühüm mesajlar verdi. O, "Terrorsuz Türkiyə"nin möhkəm təməllər üzərində yüksələcəyini bildirərək, “Ən böyük əsərimiz Terrorsuz Türkiyə olacaq,” deyib.
Sherg.az xəbər verir ki, Prezident Ərdoğan, İstanbul Atatürk Mədəniyyət Mərkəzində keçirilən “Bir Şeir, Bir Həyat: Canım İstanbul” proqramında danışıb.
“Gəncliyimizin qarşısındakı bütün maneələri aradan qaldırırıq,” deyən Ərdoğan, “Terrorsuz Türkiyə bizim ən böyük əsərimizdir. Bu əsəri gənclərimizə əmanət edəcəyik,” sözlərini səsləndirdi.
Prezident Ərdoğanın çıxışından əsas məqamlar belədir:
“İstanbulun bütün sakinlərinə, həmşərilərimə hörmət və salamlarımı çatdırıram. İstanbul kimi nadir bir şəhərdə yaşamaq böyük xoşbəxtlikdir. Belə qədim bir şəhərin sakini və xidmətçisi olmaqdan şərəf duyuram. İstanbul minillərlə tarixi özündə yaşadan bir çınardır. İstanbul haqqında edilən işləri yüksək qiymətləndiririk. Millətlərin zənginliyi, sivilizasiyaya etdikləri töhfələrlə yanaşı, yetişdirdikləri şair və alimlərlə ölçülür.
Necip Fazıl, tək partiya dövründə faşizmin hər cürünə məruz qalan bir millətin özünə dönməsini təmin etmişdir. O, heç vaxt qorxmadı. Çəkdiyi əziyyətlər boşa getmədi. Bu gün milli və mənəvi dəyərlərinə sahib çıxan bir gənclik var.
Bu gün tarixini bilən, milli kimliyini dərk edən bir gənclik var. Bu gün keçmişdən aldığı ruh və mirası gələcəyə daşımaq istəyən bir gənclik var.
Gəncliyimizin qarşısındakı bütün maneələri aradan qaldırırıq. İndiyə qədərki ən böyük əsərimiz olan Terrorsuz Türkiyəni inşallah çox möhkəm təməllər üzərində yaxın zamanda yüksəldəcəyik. Bu əsəri də gənclərimizə əmanət edəcəyik.”
