"Hökümət də Bakının yükünü azaltmaq üçün tədbirlər görməlidir”
BAXCP sədri, deputat Qüdrət Həsənquliyev Azərbaycan paytaxtının Bakıdan Ağdama köçürülməsini təklif edib.
Deputat hesab edir ki, həm iqlim, həm də təhlükəsizlik məsələlərinə görə Bakı paytaxt roluna uyğun deyil.
“Regionlarda iş yerlərinin olmaması, əksər şirkətlərin və təhsil müəssisələrinin Bakıda yerləşməsi insanların paytaxta axınına səbəb olur. Bundan başqa, ölkədəki bütün nəqliyyat vasitələrinin 72 faizi Bakıda yerləşir ki, bu da böyük tıxaclara səbəb olur. Bütün bunlar yenidən paytaxtın köçürülməsi məsələsini qabardır”.
Deputat həmçinin digər strukturların da Qarabağa köçürülməsi təklifini irəli sürüb:
“Bakı çox yüklənib, artıq hərəkət etmək mümkün deyil. Dövlət strukturlarının bir qismini burada qoyub, parlamentin, Prezident Administrasiyasının inzibati binalarını Ağdama köçürmək olar. Bu həm təhlükəsizlik baxımından, həm də Qarabağın tezliklə nizamlanması baxımından faydalıdır”.
Regionlarda iqtisadi, siyasi, sosial, tibb, təhsil və.s ilə bağlı infrastrukturların inkişafının aşağı olması ilə bağlı vətəndaşlar bəzən problem yaşayır. Bu, insanların Bakıya gəlməsinə səbəb olurdu. Son zamanlarda ölkə ərazisindəki işsizlik səviyyəsinin artması və iş yerlərinin az olması paytaxta geniş insan axımı ilə nəticələnir. Ölkədə tıxaclar artır, sıxlıq üzündən hərəkət etmək çətinləşir. Buna görə paytaxtın dəyişdirilməsi aktual mövzu olub.
Paytaxtın Bakıdan Ağdama köçürülməsi əlverişlidirmi? Bununla bağlı hansı addımlar düşünülür?
Mövzu ilə bağlı “Sherg.az”a fikirlərini bildirən “525-ci qəzet"in baş redaktoru Rəşad Məcid bu təklifi təxminən 15 il əvvəl verdiyini qeyd edib:
“Bununla bağlı "525-ci qəzet"də silsilə yazılar vermişdik. Hətta televiziyalarda debata çıxanda da bunu vurğulamışam. Fikir bu idi ki, ölkə əhalisinin az qala yarısı paytaxtda yaşayır. Bakıda narahatçılıq var. Ona görə də paytaxtı dəyişməklə bu problemi həll etmək olar. Təəssüf ki, bu, o vaxtlar alınmadı”.
O, hətta fərqli şəhərlərin də paytaxt mövqeyinə uyğun olduğunu izah edib:
“Biz bu məsələni qabardanda aydın oldu ki, Cümhuriyyət dönəmində də paytaxtı Göyçayda yerləşən Qaraməryəm kəndində salmaq istəyirdilər. Ora həm Arana, həm dağa yaxın olan, geniş düzlüyə malik ərazi idi. Diskusiyalar aparanda müxtəlif fikirlər səslənib. Düzdür, Ağdam onda işğal altındaydı. Gəncə, Yevlax və başqa şəhərlərin adlarını çəkənlər olurdu. İndi hesab edirəm ki, Ağdamın paytaxt olması uğurlu bir iş olar. Əlbəttə ki, bu alınsa, problemlər həll olunar. Çünki təsəvvür edin ki, Ağdamda 1 milyonluq bir şəhər olarsa, ətrafdakı o xırda 20-30 minlik etnik xalq yoxa çıxacaq.
R.Məcid bu məsələni hələki real hesab etmədiyini də vurğulayıb:
“Həmişə, elə, torpaqlar azad olunanda da demişəm ki, Ağdamda 300-500 minlik şəhər salınması vacibdir. İstər universitetlər, istərsə də nazirliklər orada yerləşdirilə bilər. Bu, həm siyasi mənada düzgün qərardır, həm də əhalinin paytaxtdakı sayını azaltmaq üçün uğurlu variantdır. Bu şəhər həddindən artıq sıxlığa malikdir. Hökümət də Bakının yükünü azaltmaq üçün tədbirlər görməlidir”.
Cəmilə ƏZİM
