İran Hizbullah, HAMAS və husilər də daxil olmaqla, proksi qüvvələrinə arxalanaraq bizə hücum etdi. Biz İranın dəstəklədiyi terror oxunu məhv edəcəyik.
APA xəbər verir ki, bunu İsrailin Baş naziri Benyamin Netanyahu Budapeştdə Macarıstanın Baş naziri Viktor Orbanla keçirdiyi birgə mətbuat konfransında deyib.
Netanyahu İranın dəstəklədiyi HAMAS, Hizbullah və husilərin hücumlarına məruz qaldıqlarını vurğulayıb, əsas təhlükənin İranın özü olduğunu qeyd edib.
Baş nazir bildirib ki, İsrailin addımları təkcə özünümüdafiə ilə məhdudlaşmır.
Onun sözlərinə görə, İsrail hətta Avropanı qoruyur: “Bu təhlükə yalnız bizə deyil, Avropaya və Yaxın Şərqdəki bir çox qonşularımıza da təsir edir. Biz bunu etməyə qərarlıyıq və bununla həm də Avropanı qoruyuruq. Ola bilər ki, Avropada bəzi ölkələr bunu tam anlamır. Lakin Viktor Orban bizi anlayır”, – İsrail Baş naziri vurğulayıb.
O əlavə edib ki, İsrail bütün girovları qaytarmağa sadiqdir, o cümlədən Macarıstan vətəndaşı olan girovu da azad etməyə çalışırlar.
