Çünki bu şəhərdə yaşamaq üçün hər cür şərait var
Mingəçevirdə evlərin qiyməti həddən artıq dərəcədə yüksəlib. Sakinlərin dediyinə görə, 1-2 otaqlı evlər 38-40 minə təklif edilir. Lakin ipoteka ilə ev almağa cəhd edən vətəndaşların maaşları buna çatmır. Mingəçevirdə rieltor xidmətində çalışanlar da qiymətlərin artdığını, hətta fantastik həddə çatdığını təsdiqləyib.
AVCİYA-nın Seçki Qərargahının rəhbəri Məhərrəm Zülfüqarlı Mingəçevirdə evlərin qiymətinin artmasına münasibət bildirərkən qeyd edib ki, bəzi səbəblərə görə buradakı evlərin qiymətinin yüksək olması təəccüblü deyil:
"Mingəçevir ölkəmizin ən gözəl şəhərlərindəndir. Bu şəhər strateji cəhətdən də olduqca əhəmiyyətli ərazidə yerləşir. Fikir verin, Bakı-Tiflis dəmir yolu, eyni zamanda Bakı-Tiflis magistral yolu buradan keçir.
Su anbarı, su elektrik stansiyası da Mingəçevirdə mövcuddur. Havası isə daima günəşlidir. Bu şəhərdə yaşamaq üçün hər cür şərait var.
Həmçinin bu ərazi Qarabağa da yaxındır. Burada yaşayıb Qarabağın istənilən bölgəsinə asanlıqla getmək mümkündür. Fikirləşirəm ki, sadalanan səbəblərə görə evlərin qiymətindəki artım normaldır.
Başqa bir səbəb isə Mingəçevir şəhərində sənayenin, bir çox sahələrin inkişaf etməsidir. Belə olan halda isə bu əraziyə əhali axını baş verəcək. İnsanlar Mingəçevirə işləmək üçün üz tutacaqlar. Ona görə də evlərin qiymətindəki yüksəlmə təəccüblü deyil".
Aytac Ali
