Azərbaycanda illik inflyasiya 2025-ci ilin aprel ayında 6,3 faizə yüksəlib.
Bu barədə Dövlət Statistika Komitəsi istinadən xəbər verib. Məlumata görə, qida məhsulları, alkoqollu içkilər və tütün məmulatları üzrə inflyasiya 7,6 faiz, qeyri-qida məhsulları üzrə 2,7 faiz, əhaliyə göstərilmiş ödənişli xidmətlər üzrə 7,6 faiz təşkil edib.
2025-ci ilin aprel ayında istehlak qiymətləri indeksi əvvəlki aya nisbətən 100,3 faiz, yanvar-aprel aylarında isə əvvəlki ilin müvafiq dövrünə nisbətən 105,8 faiz təşkil edib.
Məsələyə münasibət bildirən iqtisadçı -ekspert Eyyub Kərimli Sherg.az-a söyləyib ki, inflyasiyanın bu həddə çatması gözlənilən idi:
“Çünki ötən il həm İqtisadiyyat Nazirliyi, həm də Mərkəzi Bank inflyasiyanı 5-7 faiz arası proqnozlaşdırmışdı. Bunun bir neçə amili var. Biz ölkə olaraq idxaldan asılıyıq. Burada həm xarici amillərin, həm də ət və ət məhsulları üzrə istehsal da aşağı düşdüyü üçün öz təsirini göstərir. İndi biz daha çox ət məhsullarını, bəzi yağları idxal edirik. İdxal etdiyimiz ölkələrdə isə qiymətlər artıb. Bu, həm logistika, həm də ümumi məhsul qiymətlərinin artımıdır. Hesab edirəm ki, Mərkəzi Bank hazırda bununla bağlı düzgün siyasət yürüdür. Uçot dərəcəsi dəyişilməz qalıb, hələki inflyasiyanı sabit saxlamağa və iki rəqəmə keçməsinə imkan verməyib. Ümumiyyətlə, digər tərəfdən, qarşıdan yay mövsümü gəlir və istirahət sezonu açılır. Həmin ərəfələrdə müəyyən tələblərin artması müşahidə olunur və bu da qiymətin artımına təsir göstərir. Digər tərəfdən həm Bakı şəhərində, həm bölgələrimizdə, həm də Qarabağ iqtisadi rayonlarında artıq böyük həcmli tikinti işləri gedir. Bu da, tikinti sahəsində qiymət artımına səbəb olur. Hesab edirəm ki, bu təbii inflyasiyadır”.
