Bir neçə gün bundan əvvəl “Turan” İnformasiya Agentliyin kollektivi adından media qurumunun direktoru direktoru Mehman Əliyev məlumat verib ki, agentlik fəaliyyətini dayandırır. Agentlikdə yayımlanan məlumatda bildirilib ki, buna səbəb maliyyə çətinlikləridir:
"Biz hazırkı modeldən geri çəkilsək də, əsas məqsədimizdən - mürəkkəbləşən dünyanı anlamağa kömək edən müstəqil səs olmaqdan imtina etmirik".
Bundan sonrakı fəaliyyətinin hansı istiqamətdə olacağı ilə bağl Mehman Əliyevə müraciət etdik.
O, “Sherg.az”a söylədi ki, hazırda qanun çərçivəsində agentliyin fəaliyyətinin dayandırılması proseduru gedir:
"Mart ayının sonu yeni format, yeni planlar haqqında məlumat veriləcək. İndiyə qədər xəbərləri hazırlayanda analitik yazılara üstünlük verirdik. Buna görə də həmin istiqamət daha vacib və maraqlıdır. Analitik yazıları prioritet kimi görürəm. Yeni komandaya gəldikdə isə, üzvlər arasında analitiklər, formalaşmış yazarlar da var. Kim istəsə qalar, istəməyən isə gedər. Həmçinin yenilər də əlavə oluna bilər. Lakin maliyyə problemləri var ki, bu məsələləri həll etmək lazımdır. İlkin mərhələ üçün aydınlaşdırmalısan ki, məhsulunu kimlər alacaq, nə qədər vəsait toplaya bilərsən və inkişaf olacaqmı? Bizim mövcud və yeni abunəçilərlə danışıqlar aparılmalıdır. Yəni bunların hər biri zaman tələb edir. Digər tərəfdən formatın necə olacağı barədə hələ ki qərar yoxdur. Agentliyin adında ciddi dəyişiklik olacağını hesab etmirəm. Yəqin ki, analitik xidmətin adı ilə davam edəcəyik".
