Dünən Prezident İlham Əliyev Bakıda Hərbi Qənimətlər parkının açılışında iştirak edən zaman çox mühüm məqamlara toxunub. Dövlət başçısı, həmçinin Şuşaya atılan raketlərlə bağlı da danışıb: “Şuşanı ermənilər bu “İskəndər-M” raketləri ilə atəşə tutmuşdular. Ermənistan ordusunda bu raketlər haradandır? Bu raketlər olmamalı idi. Artıq bu, əyani sübutdur. Ermənistanın hərbi cinayətinin sübutudur”.
“Biz cavab istəyirik. Bu ölümcül silah Ermənistanın əlinə necə düşdü? Hələ ki, cavab ala bilməmişik. Amma alacağıq. Hər kəs gəlsin, görsün, Şuşanı, bizim qədim şəhərimizi Ermənistan “İskəndər-M” raketləri ilə məhv etməyə çalışırdı.
Şuşanı biz azad edəndən sonra bundan istifadə etdilər. Bizdə kifayət qədər məlumat var. Sadəcə olaraq biz rəsmi açıqlama gözləyirik. Hər kəs gəlib bunu görəcək. Erməni vəhşiliyinin, hərbi cinayətinin növbəti əyani sübutudur”. – deyə, prezident əlavə edib.
![](https://sherg.az/uploads/editor/1743710ceda1964fd64da849d2472832.jpg)
Millət vəkili Razi Nurullayev “Sherg.az”a açıqlamasında bildirib ki, məsələnin mahiyyətinə varmaq lazımdır:
“İskəndər-M”in Qarabağda istifadə edilməsi ancaq Ermənistanla bağlı deyil. Çünki düşmən ölkədə yalnız E” tipli raketlər var. Həmçinin Rusiyanın müharibə dövründə hər gün Ermənistana silah göndərdiyini nəzərə almaq lazımdır.
Bunu hətta Rusiyadakı Ermənistan lobbisi və diasporu edibsə belə, onlar üçün şərait yaradılıb. Sadəcə hər şey görməzlikdən gəlinir. Moskvadan xəbərsiz və onun iştirakı olmadan “İskəndər”in Qarabağda tətbiqi sadəcə mümkün deyil.
Bəzi adamlar öz bəyanatları ilə Kremlin “xətrinə dəyməməyə”, bütün məsuliyyəti Ermənistanın boynuna atmağa çalışırlar.
Halbuki indiyədək onun əleyhinə bircə platformada belə olmadığımız Rusiya bizə arxadan zərbə vurdu.
Hələ XX əsrdə ABŞ prezidenti Ronald Reyqanla SSRİ başçısı Qorbaçov arasında imzalanan müqaviləyə görə ortaq və uzaqmənzilli silahların tətbiqi qadağan edilirdi.
Rusiya bu müqaviləyə məhəl qoymadığı üçün beynəlxalq məsuliyyət daşıyır”.