“Ziyalılarımız mübarizə aparmalıdırlar, mövqeyimizi dünyaya bəyan etməliyik”
“Heç bir qurum bizə bir kəlmə də deyə bilməz. Çünki biz müqəddəs amal-torpaqlarımız uğrunda vuruşuruq”
Avropa Şurası Parlament Assambleyasında (AŞPA) Azərbaycan nümayəndə heyətinin rəhbəri, millət vəkili Səməd Seyidov Qazax və Ağstafada da olub. O, Tovuzda gedən döyüşlərdə qəhrəmancasına şəhid olan əsgərlərimizin dəfn mərasiminə qatılıb. Şəhid ailələri ilə görüşüb, onlara başsağlığı verib.
Adıçəkilən rayonlarda insanların müharibə təəssüratları ilə bağlı “Sherg.az”a danışan S.Seyidov qeyd edib ki, sakinlər olduqca mübarizdirlər:
“Düşmənin Azərbaycanda çaxnaşma yaratmaq niyyəti bumeranq effekti verdi. Yəni indi ermənilər özləri narahatdırlar. Onlar xalqımız qarşısında tab gətirə bilməyəcəklərini anlayırlar. Və başa düşürlər ki, vətənpərvərlik ən güclü zərbədir”.
Parlementari, həmçinin diqqətə çatdırıb ki, biz silahımızı əlimizdən yerə qoymamalı, mübarizəni davam etdirməliyik:
“Həmin proseslər təkcə Qazaxda, Ağstafada yox, bütün Azərbaycanda gedir. Ziyalılarımız da əsgərlər kimi mübarizə aparmalı, haqq səsimizin eşidilməsinə çalışmalıdırlar. Mövqeyimizi bütün dünyaya bəyan etməliyik. Əlbəttə, insanların ovqatı hamımızı ruhlandırır. Heç kim, heç bir qurum bizə bir kəlmə də deyə bilməz. Çünki biz müqəddəs amal-torpaqlarımız uğrunda vuruşuruq”.
