“Gürcüstanın iki bölgəsi Rusiyanın işğalı altındadır və bu şəraitdə diplomatik əlaqələrin bərpası haqqında danışmaq mümkün deyil”.
Teleqraf-ın yerli bürosu xəbər verir ki, bunu Gürcüstanın xarici işlər naziri Maka Boçorişvili İmedi telekanalının efirində yayımlanan “Günün xronikası” proqramında deyib.
Nazir qeyd edib ki, Rusiya hakimiyyətinin nümayəndələri mütəmadi olaraq Gürcüstanla diplomatik əlaqələrin bərpasına hazırlıqla bağlı bəyanatlar səsləndirirlər.
“Məsələ çox sadədir. Hamı Gürcüstanla Rusiya arasında diplomatik əlaqələrin bərpasının qarşısında duran problemin nədən ibarət olduğunu yaxşı bilir. Bu, ərazilərimizin işğalıdır və bu məsələ Rusiya ilə münasibətlərin normallaşması üçün bir nömrəli maneədir. İşğal şəraitində nə diplomatik əlaqələrin bərpası, nə də münasibətlərin normallaşmasından söhbət gedə bilər”, - XİN başçısı söyləyib.
Qeyd edək ki, Rusiyanın xarici işlər nazirinin müavini Mixail Qaluzin “İzvestiya” nəşrinə müsahibəsində Moskvanın Tbilisi ilə diplomatik əlaqələri bərpa etməyə hazır olduğunu bildirib.
