"İran Ermənistanla Azərbaycan arasında 2020-ci il 10 noyabr tarixli üçtərəfli Bəyanatın müddəalarından biri olan Zəngəzur dəhlizinin açılmasına mane olmaq üçün var gücü ilə çalışır".
Bu sözləri "Sherg.az"a açıqlamasında siyasi şərhçi Elmir Səftərov söyləyib.
Onun sözlərinə görə, İkinci Qarabağ müharibəsi dövründə regiondakı dəyişiklikləri qəbullana bilməyən İran savaş yekunlaşdıqdan sonra da düşünür ki, Zəngəzur dəhlizi açılarsa, Azərbaycan və Türkiyə iqtisadi baxımdan böyük fayda əldə edəcək. Bu da İranın regionda hər iki ölkəyə təsir rıçaqlarını zəiflədəcək:
"İran hələ də Azərbaycan və Türkiyənin ərazisindən tranzit dəhlizi kimi istifadə edir. Tehran, həmçinin dəhlizin Ermənistanla qurudan birbaşa əlaqəsinin kəsilə biləcəyindən narahatdır. Halbuki, Zəngəzur dəhlizi regional kommunikasiyaların və nəqliyyat yollarının açılmasını özündə ehtiva edir, hər hansı bloklanma məsələsi isə reallığı əks etdirmir.
Əsl həqiqət isə ondan ibarətdir ki, İran Yaxın Şərqdə olduğu kimi Türkiyənin regional və qlobal təsirinin artmasını, eyni zamanda, Bakı və Ankaranın birləşməsini istəmir. Bunu həm özü, həm də müttəfiqləri ilə gizli ortaq maraqları kontekstində həyata keçirir".
Siyasi şərhçi əlavə edib ki, İranın qonşu dövlətlərin sərhədlərində hər hansı dəyişikliyi özü üçün qırmızı xətti adlandırmasına baxmayaraq, Tehran nəinki Ermənistanın Azərbaycan torpaqlarına təcavüzünə narazılıq ifadə etmədi, hətta İrəvanla genişmiqyaslı əməkdaşlığı genişləndirdi:
"Dəhliz açılacağı təqdirdə NATO-nun bölgədə mövcudluğu üçün zəmin hazırlanacağı, həmçinin Cənubi Qafqazda İranın “düşmənləri”nin olacağı da reallıqları təhrif etməkdən başqa bir şey deyil. Bəllidir ki, Azərbaycan səmimi və bərabərhüquqlu bütün əməkdaşlığın tərəfdarıdır. Heç bir hərbi bloka qoşulmayan, balanslı siyasət yürüdən ölkəmiz qonşularının ərazi bütövlüyünə və suverenliyinə hörmət edir".
