Ümumdünya Səhiyyə Təşkilatının (ÜST) baş direktoru Dr. Tedros Adhanom Qebreyesus "Covid-19"un "Omicron" ştammı ilə bağlı xəbərdarlıq edib. O qeyd edib ki, sözügedən ştammın son variant olduğunu iddia etmək təhlükəlidir.
"Sherg.az" "Cumhuriyet"ə istinadən xəbər verir ki, İsveçrənin Cenevrə şəhərində ÜST-nin 150-ci İcraiyyə Şurasının iclası videokonfrans üsulu ilə başlayıb. Qebreyesus epidemiyanın sonunun gəlməsi haqqında düşünməyin təhlükəli olduğunu izah edib:
"Omicron”un son variant olacağını və ya oyunun sonu olduğunu düşünmək təhlükəlidir. Əksinə, qlobal miqyasda daha ölümcül variantın ortaya çıxma potensialı çox realdır" .
O, buradakı nitqində epidemiyanın başlamasından sonrakı iki il ərzində dünya üzrə 350 milyon yoluxma halının və 5,5 milyon ölüm hadisəsinin olduğunu bildirib:
"Hamımız bilirik ki, bu rəqəmlər çox daha yüksəkdir".
Keçən həftə orta hesabla hər üç saniyədə bir ÜST-ə 100 yoluxma faktının bildirildiyindən bəhs edən T.A.Qebreyesus hər 12 saniyədə bir insanın "Covid-19"dan öldüyünü qeyd edib.
Həmçinin o, "Covid-19"dan ölümlərin peyvəndləmənin ən az olduğu Afrikada artmasına diqqət çəkib.
Cəmilə ƏZİM