Azərbaycanda koronavirusa yoluxanlar üçün karantin müddəti 7 günə endirilib. Bu barədə Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyi birgə məlumat yayıb.
Bunun səbəbləri barədə “Sherg.az”a danışan İnfeksionist - hepatoloq Mərdan Əliyev bildirib ki, karantin müddətinin 7 günə endirilməsi beynəlxalq təcrübə ilə bağlıdır:
“Bilirsiniz ki, “Omicron” variantı bizə yeni gəlsə də, Avropa və Türkiyədə iki aya yaxındır ki, mövcuddur. Onlarda da bu müddət 14 gündən 7 günə endirilib. Bizim ekspertlər də 7 günün kifayət etdiyini müşahidə ediblər və xarici təcrübəyə əsasən, həmin müddət azaldılıb. Bu onunla əlaqəlidir ki, artıq vaksinasiya olunanların və xəstəlikdən sağalanların sayı artıb. Eyni zamanda, virusun yoluxdurma qabiliyyəti xəstəliyin 1 və 2-ci günü çox olur. Bundan sonrakı günlərdə yoluxma qabiliyyəti kəskin sürətdə zəifləyir.
Ölkəmizdə “Omicron”a yoluxmada sürətli artım var. Bundan sonra da artım gözlənilir . Bütün bunları nəzərə alaraq karantin müddəti 7 günə endirilib. Amma bu o demək deyil ki, 7 gündən sonra şəxs mütləq çölə çıxmalıdır. Tövsiyə olunur ki, əgər şəxsin qızdırması 6-7-cü gün də davam edirsə, həmin şəxs ehtiyatlı davranmalıdır. Birinci növbədə öz sağlamlığını düşünməlidir. Həmçinin, sonrakı bir həftə ərzində tibbi maskalardan istifadə etməlidir”.
Çimnaz Şahlar