Sumqayıt şəhərində xəstəxanada dərmandan zəhərlənərək öldüyü bildirilən şəxsə qoyulan ilkin diaqnoz məlum olub.
Sumqayıt Şəhər Psixiatriya Xəstəxanasından Oxu.Az-a verilən məlumata görə, 58 yaşlı pasiyentə "eksudativ plevrit" diaqnozu qoyulub:
"Ramiz Pirqulu oğlu Piriyev 2023-cü ilin sentyabrın 28-dən etibarən Sumqayıt şəhər Psixiatriya Xəstəxanasında qeydiyyatda olub və müalicə alıb. 2025-ci il yanvarın 13-də "törədici dəqiqləşdirilməyən pnevmoniya, eksudativ plevrit" diaqnozu ilə Sumqayıt Şəhər Təcili və Təxirəsalınmaz Tibbi Yardım Xəstəxanasının terapiya şöbəsinə köçürülüb".
Kliniki Tibbi Mərkəzin Toksikologiya şöbəsinin həkim-toksikoloqu Aynur Məmmədova "Sherg.az"a bildirib ki, zəhərlənmələr əsasən həkimin yazdığı dərmanlar təyinata uyğun qəbul edilmədikdə yəni, aşırı dozada qəbul edildikdə zəhərlənmələr baş verir:
“Zəhərlənmələr zamanı daha çox ürək, təzyiq və şəkər dərmanları ölüm halları yaradır. Uşaqlar nəzarətsiz qaldıqda, valideynlərin, nənələrin, babaların, içdiyi dərmanları uşaqlar ayırd edə bilmirlər. Uşaqlar çox miqdarda dərman qəbul edəndə ölüm hadisəsi daha çox baş verir. Görünür ki, 58 yaşında kişidə hər hansı bir problem olub və dərmanın miqdarı hədsiz dərəcədə aşılıb. Belə olan halda xəstəni tez bir zamanda xəstəxanaya çatdırsınlar ki, mədəsi yuyulsun, dərmanlar var onlardan istifadə etsinlər və venadaxili lazım olan simptomatik müalicələr edilsin. Zəhərlənmələr zamanı hər dəqiqə insanın ömründən gedir. Ona görə də ərazi üzrə ən yaxın xəstəxanaya çatdırılmalıdır. İlkin yardımdan sonra artıq toksikologiya şöbəsinə yerləşdirilməlidir”.
